जामनेरात प्रदेशाध्यक्ष जयंत पाटील यांच्या उपस्थितीत फुंकले रणशिंग
जामनेर (प्रतिनिधी) : जळगाव जिल्हा परिषदेचे माजी अध्यक्ष दिलीप खोडपे यांनी अखेर राष्ट्रवादी काँग्रेस पक्षाच्या शरद पवार गटामध्ये प्रवेश केला आहे. त्यांनी प्रदेशाध्यक्ष जयंत पाटील यांच्या उपस्थितीमध्ये खांद्यावर तुतारी चिन्ह असलेला झेंडा घेऊन जल्लोष केला. या वेळेला जिल्ह्यातील विविध तालुक्यातील नेते मंडळी उपस्थित होते.
भाजपचे मंत्री गिरीश महाजन यांच्या विरोधात दिलीप खोडपे हे निवडणूक रिंगणात उतरणार असल्याचे चित्र स्पष्ट होत आहे. पक्षातर्फे त्यांना उमेदवारी देण्याबाबत हालचाली सुरू आहेत. शनिवारी दि. २१ सप्टेंबर रोजी जामनेर येथे झालेल्या राष्ट्रवादी काँग्रेस पक्षाच्या मेळाव्याला सर्व नेत्यांनी उपस्थिती लावलेली दिसून आली.
प्रदेशाध्यक्ष जयंत पाटील, जिल्हाध्यक्ष प्रमोद पाटील, माजी मंत्री गुलाबराव देवकर, माजी मंत्री सतीश पाटील, माजी जिल्हाध्यक्ष रवींद्र पाटील, माजी आ. अरुण पाटील, रावेर येथील श्रीराम दयाराम पाटील, अमळनेरचे माजी आमदार बी. एस. पाटील यांच्यासह जामनेर जिल्ह्यातील राष्ट्रवादी काँग्रेस पक्षाचे पदाधिकारी, कार्यकर्ते उपस्थित होते.
