भडगाव तालुक्यातील रेल्वे उड्डाणपुलावरील घटना
जळगाव (प्रतिनिधी) : भडगाव तालुक्यातील कजगाव ते पारोळा रोडवर रेल्वे उड्डाणपुलावर भरधाव दुचाकीला अज्ञात वाहनाने दिलेल्या धडकेत दुचाकीस्वाराचा उपचारादरम्यान धुळे येथे मृत्यू झाल्याची घटना सोमवार दि. २४ मार्च रोजी दुपारी ३ वाजता घडली आहे. याप्रकरणी भडगाव पोलीस स्टेशनला गुन्हा दाखल करण्याचे काम सुरू होते.
रमेश पोपट पाटील (वय ५४, रा. कनाशी ता. भडगाव) असे मयत व्यक्तीचे नाव आहे. त्यांच्या पश्चात भाऊ, पत्नी, एक मुलगा, एक मुलगी असा परिवार आहे.(केसीएन) शेती काम करून ते परिवाराचा उदरनिर्वाह करीत होते. रविवारी दि. २३ मार्च रोजी दुपारी ३ वाजेच्या सुमारास ते कनाशी येथे घरी जात असताना कजगाव ते पारोळा रस्त्यावरील रेल्वे उड्डाणपुलावर त्यांच्या दुचाकीला भरधाव वाहनाने जबर धडक दिली.
कुटुंबीयांनी त्यांना उपचारासाठी धुळे येथील रुग्णालयामध्ये उपचारासाठी दाखल केले होते. दरम्यान उपचार सुरू असताना सोमवारी दि. २४ मार्च रोजी दुपारी ३ वाजता त्यांचा उपचारादरम्यान मृत्यू झाला आहे. या प्रकरणी कनाशी गावावर शोककळा पसरली असून भडगाव पोलीस स्टेशनला गुन्हा दाखल करण्याचे काम सुरू होते.
