पाचोरा शहरातील घटना, रोडरोमिओंची हिम्मत वाढली
पाचोरा (प्रतिनिधी) : शहरातील एका १३ वर्षीय अल्पवयीन मुलीला माझ्याशी लग्न कर व माझ्यासोबत चल. अन्यथा तुझ्यावर ऍसिड फेकेल अशी धमकी दिल्याप्रकरणी तरुणाविरुद्ध पाचोरा पोलीस स्टेशनला गुन्हा दाखल करण्यात आला आहे. संशयित तरुणाला अटक करण्यात आली आहे. दरम्यान दिवसेंदिवस गुन्हेगारांची हिंमत वाढत चालली असून पोलिसांचा वचक कमी होत आहे की काय असा प्रश्न निर्माण झाला आहे.
पाचोरा शहरामध्ये एका कॉलनीत राहणाऱ्या परिवारातील १३ वर्षीय मुलगी ही शिक्षणानिमित्त देशमुख वाडी परिसरातील विद्यालयात दररोज ये-जा करते. गेल्या दोन महिन्यांपासून संशयित आरोपी समीर सलीम पिंजारी रा. कुरबान नगर, माहेजी नाका, पाचोरा हा तिला शाळेतून येता जाता त्रास देत होता. तसेच तिच्या घराजवळ देखील येऊन परेशान करीत होता. तू माझ्याशी लग्न कर. माझ्या सोबत चल. नाहीतर मी ऍसिड टाकेल अशी धमकी देखील देत होता.
तसेच अल्पवयीन तरुणीच्या मनाला लज्जा उत्पन्न होईल असे कृत्य त्यानी केले. त्यामुळे सदर तरुणीने हिम्मत दाखवून कुटुंबीयांना माहिती दिली. त्यानंतर मुलीच्या आईच्या फिर्यादीवरून पाचोरा पोलीस स्टेशनला गुरुवारी २७ जुलै रोजी संध्याकाळी पावणे ७ वाजेच्या सुमारास गुन्हा दाखल करण्यात आला आहे. संशयित तरुण समीर सलीम पिंजारी यास लागलीच ८ वाजेच्या सुमारास पोलिसांनी ताब्यात घेऊन अटक केली आहे. तपास डीवायएसपी धनंजय येरुळे हे करीत आहेत.
