एरंडोल-पारोळा मार्गावर अपघातांची मालिका कायम ; चुकीच्या हायवेच्या कामामुळे नागरिकांमध्ये तीव्र संताप
एरंडोल (प्रतिनिधी): एरंडोल-पारोळा रस्त्यावर आज, गुरुवार, दि. २० नोव्हेंबर रोजी सकाळी ७ वाजण्याच्या सुमारास एक हृदयद्रावक अपघात घडला. मागुन येणाऱ्या डंपरने धरणगाव तहसील कार्यालयातील कर्मचारी शिवाजी रघुनाथ महाजन (वय ४२, रा. पारोळा, ह.मु. अष्टविनायक कॉलनी, एरंडोल) जोरदार धडक दिली.यांचा जागीच मृत्यू झाला.
महाजन हे एरंडोल-पारोळा मार्गावरील रघुवीर समर्थक बैठक हॉलसमोर मॉर्निंग वॉक करत असताना, मागून भरधाव वेगाने आलेल्या (एच.आर. ३८ ए.डी. ४१३६) रिकाम्या डंपरने त्यांना जोराची धडक दिली. या भीषण धडकेत त्यांचा जागीच मृत्यू झाला.अपघाताची माहिती मिळताच एरंडोल शहरात मोठी खळबळ उडाली.
घटनेची माहिती मिळताच एरंडोल पोलीस स्टेशनचे पो.हे. कॉ. राजू पाटील, अमोल भोसले आणि विजू पाटील यांनी तात्काळ घटनास्थळी धाव घेतली. मात्र, अपघात होताच डंपर चालक वाहन सोडून फरार झाला होता. पोलिसांनी डंपर जप्त करून पोलीस स्टेशनमध्ये जमा केले आहे. मयत शिवाजी महाजन यांचे पार्थिव उपजिल्हा रुग्णालय, एरंडोल येथे शवविच्छेदनासाठी पाठवण्यात आले आहे.
निकृष्ट कामावर नागरिकांचा तीव्र संताप
ज्या डंपरमुळे हा अपघात झाला, ते डंपर एरंडोल-धरणगाव रस्त्याचे सुरू असलेल्या कामासाठी मुरूम वाहतूक करत असल्याची माहिती घटनास्थळी मिळाली. एरंडोल शहरातील नागरिकांनी या घटनेनंतर तीव्र संताप व्यक्त केला आहे. निकृष्ट दर्जाच्या आणि अपूर्ण हायवेच्या कामामुळे आजवर एरंडोलकरांनी २० ते २५ जणांचा जीव गमावल्याचे नागरिकांचे म्हणणे आहे. सततच्या अपघातांमुळे प्रशासनाच्या कामकाजावर प्रश्नचिन्ह उभे राहिले आहे.
फरार डंपर चालकाचा एरंडोल पोलीस कसून शोध घेत आहेत. याप्रकरणी एरंडोल पोलीस स्टेशनमध्ये गुन्हा दाखल करण्याची प्रक्रिया सुरू आहे.
