जळगाव (प्रतिनिधी) – तालुक्यातील ममुराबाद रोडवरील मनुदेवी मंदीराजवळ मालवाहू चारचाकी वाहनाच्या भीषण धडकेत दुचाकीस्वाराचा जागीच मृत्यू झाल्याची घटना मंगळवारी २८ मार्च रोजी सकाळी ८ वाजेच्या सुमारास घडली आहे. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
सुरेश गणपत कुंभार (हिवरकर, वय-४०, रा. चौघुले प्लॉट, जळगाव) असे मयत व्यक्तीचे नाव आहे. सुरेश कुंभार हे पत्नी व तिन मुलांसोबत शहरातील चौघुले प्लॉट येथे वास्तव्याला होते. विटभट्टीचा व्यवसाय चालवून आपला उदरनिर्वाह करत होते. नेहमीप्रमाणे मंगळवारी २८ मार्च रोजी त्यांचा मित्र दिलीप तुकडू कुंभार यांच्यासोबत विटभट्टीवर जाण्यासाठी दुचाकी क्रमांक (एमएच ४१ एच ९९८१) ने ममुराबाद रस्त्याच्या दिशेने निघाले.
रस्त्यावरील मनुदेवी मंदीराजवळून जात असतांना समोरून येणारी छोटाहत्ती वाहन (एमएच १९ सीवाय ८१७३) ने त्यांच्या दुचाकीला जोरदार धडक दिली. या धडकेत दुचाकीस्वार सुरेश कुंभार हे जागेवरच ठार झाले तर सोबत असलेले दिलीप कुंभार हे किरकोळ जखमी झाले. स्थानिक ग्रामस्थांनी धाव घेवून जखमीस उपचारासाठी रवाना केले. शासकीय वैद्यकीय महाविद्यालय व रुग्णालयात नातेवाईकांनी एकच गर्दी केली होती. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे. मयत सुरेश कुंभार यांच्या पश्चात पत्नी मनिषा, दोन मुले निलेश आणि योगेश आणि मुलगी कोमल असा परिवार आहे. पुढील तपास सहाय्यक फौजदार माणिक सपकाळे आणि पोहेकॉ ज्ञानेश्वर कोळी करीत आहे.
