विद्यार्थ्यांच्या कलागुण सादरीकरणाला रसिकांचा उदंड प्रतिसाद
जळगाव (प्रतिनिधी) : शहरात सुरू असणाऱ्या आमदार राजूमामा भोळे आयोजित ‘आमदार सांस्कृतिक महोत्सवा’मध्ये शुक्रवारी दि. २३ ऑगस्ट रोजी बालनाट्य स्पर्धा घेण्यात आली. स्पर्धेमध्ये दिवसभरात ९ संघांनी उत्कृष्टरित्या सादरीकरण करून रसिक प्रेक्षकांची मने जिंकली. अनेक संघांचे विषय अंतर्मुख करणारे ठरले. तर काही विनोदी नाट्याने रसिकांना हसविले.
आपल्या जळगाव शहराचा आमदार सांस्कृतिक महोत्सव गुरुवार दि. २२ ऑगस्ट ते २५ ऑगस्टदरम्यान छत्रपती संभाजीराजे नाट्यगृहांमध्ये सुरू झालेला आहे. महोत्सवामध्ये शुक्रवारी दि. २३ ऑगस्ट रोजी दुसऱ्या दिवशी बालनाट्य स्पर्धेचे उद्घाटन मान्यवरांच्या हस्ते झाले. यावेळी विचारमंचावर ज्येष्ठ रंगकर्मी रमेश भोळे, चिंतामण पाटील, बाल रंगभूमी परिषदेचे शहराध्यक्ष योगेश शुक्ल, माजी महापौर सीमाताई भोळे, माजी नगरसेविका गायत्री राणे, जितेंद्र मराठे, परीक्षक आसेफ अन्सारी (मुंबई), सुजय भालेराव (धुळे) उपस्थित होते.
यावेळी मान्यवरांनी त्यांच्या मनोगतमधून नवीन बालकलाकारांना सदिच्छा देऊन आपल्या आवडीचे क्षेत्रात कौशल्य पणाला लावून करिअर करावे असे आवाहन केले. यानंतर बालनाट्य स्पर्धांना सुरुवात झाली. सुरुवातीला भगीरथ विद्यालयाच्या ‘भुकेला राजा उपाशी प्रजा’ या बालनाट्याने सामाजिक विषय मांडला. अभिनव हायस्कूलने ‘कॉपी बहाद्दर’ या नाट्यातून कॉपीमुक्त परीक्षा यावर भाष्य केले.
गोजराई फाऊंडेशनच्या ‘गाठोड्याचे गुपित’ यातून शिक्षण व्यवस्थेवर माहिती देण्यात आली. याशिवाय का.ऊ. कोल्हे विद्यालयाच्या ‘आई मला छोटीशी बंदूक दे ना’ विषयातून मुलांच्या स्वप्नांवर प्रकाश टाकण्यात आला. तर ब्रेनकेसी, जळगाव या संस्थेचे ‘ अनइन्स्टॉलड’, कलरबोव मल्टीपर्पजच्या ‘आसमा’, सेंट टेरेसा विद्यालयाच्या ‘द बटरफ्लाईस’ यासह ‘म्हातारा गावलाय गो’ हे विशेष सादरीकरण महोत्सवांमध्ये करण्यात आले.
