चाळीसगाव (प्रतिनिधी) :- लंडन येथील जगप्रसिद्ध वेल्स ट्रिनिटी सेंट डेव्हिड निमंत्रणावरून महाराष्ट्रातील १२ आमदारांचे शिष्टमंडळ दि.२० ते २५ नोव्हेंबर दरम्यान लंडन (युके) येथे अभ्यास दौऱ्यावर जाणार आहे. यात चाळीसगाव मतदारसंघाचे आमदार मंगेशदादा चव्हाण यांची देखील निवड झाली असून ते दि.१९ रोजी मुंबई छत्रपती शिवाजी महाराज आंतरराष्ट्रीय विमानतळ येथून सकाळच्या विमानाने लंडन रवाना झाले आहेत.
या अभ्यास दौऱ्याच्या निमित्ताने वेल्स, यूके येथील विद्यापीठात सुशासन आणि सार्वजनिक धोरण या विषयावरील कार्यकारी कार्यक्रमात सहभागी होणार आहेत. वेल्समधील लॅम्पीटर कॅम्पसमध्ये, विविध सांस्कृतिक भेटींबरोबरच सुशासन आणि सार्वजनिक धोरण या विषयांवर आणि आसपासच्या अनेक दिवसांच्या कार्यशाळांमध्ये आमदार चव्हाण सहभागी असतील. या कार्यक्रमात कार्डिफमधील सेनेड असेंब्लीला आणि वेस्टमिन्स्टर येथील संसदेच्या सभागृहांना भेट देणे देखील समाविष्ट आहे. कार्यक्रमाची समाप्ती व्हाईटहॉलमधील नॅशनल लिबरल क्लबमध्ये औपचारिक डिनरद्वारे केली जाणार आहे.
छत्रपती शिवाजी महाराजांनी ज्या वाघनखांनी अफजलखानाचा वध केला होता ते वाघनखे ठेवण्यात आलेल्या व्हिक्टोरिया आणि अल्बर्ट म्युझियमला आमदारांचे शिष्टमंडळ भेट देणार असून आपल्या महाराष्ट्राच्या एका दैदिप्यमान अश्या इतिहासाची खुण असणाऱ्या शिवरायांच्या वाघनखांचे दर्शन यानिमित्ताने होईल, यासोबतच डॉ.बाबासाहेब आंबेडकर यांचे लंडन येथील निवासस्थानाचे भव्य स्मारकात रुपांतर करण्यात आले आहे, सदर स्मारकाला तसेच लंडन येथील महात्मा गांधीजी यांच्या पुतळ्याला देखील आमदारांचे शिष्टमंडळ अभिवादन करणार आहेत.
