बोदवड रेल्वे स्थानकाजवळ घटना
मुक्ताईनगर ( प्रतिनिधी ) – बोदवड येथील रेल्वे स्थानकावरून शुक्रवार दि. ६ जून रोजी दुपारी २ वाजेच्या सुमारास जात असताना बोदवड रेल्वे स्थानकाच्या उप लाईनवर जात असताना एका बसचालकाने रेल्वेखाली झोकून देत आत्महत्या केल्याची घटना उघडकीस आली आहे.
कन्व्हरलाल एकनाथ अठ्ठकाळे (वय ४३, रा. हरताळा, ता. मुक्ताईनगर) असे मयत बसचालकचे नाव आहे. त्याच्या पश्चात पत्नी, मुलगा व मुलगी असा परिवार आहे. कनव्हरलाल हा पुणे महानगरपालिकेचा बसचालक होता. गत महिन्यातच मुलीचे लग्न झाले असून मुलगा दहावीचे शिक्षण घेत आहे. सकाळी तो पत्नीसोबत मुक्ताईनगरच्या रुग्णालयात जाऊन आला व पत्नीला घरी सोडत ‘मी मित्रांना भेटून येतो’ असे सांगून थेट बोदवड रेल्वे स्थानक त्याने गाठले व मोबाइलवर मुलाला संदेश पाठवत आत्महत्या करत असल्याचे कळविले. या बसचालकाला फुप्फुसाचा कर्करोग असल्याने त्याच्यावर उपचार सुरू होते. या आजाराला कंटाळून त्याने हे कृत्य केल्याचे सांगण्यात येत आहे. पोलीस अधिक तपास करीत आहे.
