नवी दिल्ली (वृत्तसंस्था) : जगभरात कोरोना व्हायरसचे थैमान सुरू आहे. कोरोनाचा संसर्ग रोखण्यासाठी जगभरातील अनेक देशांमध्ये कोरोनाच्या वॅक्सीनवर काम सुरू आहे. भारतातही १५ ऑगस्टपर्यंत कोरोनाचे वॅक्सीन लाँच करण्यात येईल असे सांगण्यात येत आहेत. मात्र संसदीय समितील दिलेल्या माहितीनुसार कोरोनाची लस २०२१ आधी उपलब्ध करून देणे कठीण असल्याचे सांगितले जात आहे. ही लस सर्वत्र उपलब्ध होण्यासाठी २०२१ साल उजाडेल असाही कयास आहे.
विज्ञान आणि तंत्रज्ञान मंत्रालयाशी संबंधित संसदीय समितीच्या अधिका-यांनी यासंदर्भात माहिती दिली. या वर्षात कोरोनाची लस तयार करून ती सर्वत्र उपलब्ध करणे शक्य नसल्याचे अधिका-यांनी सांगितले. २०२१ च्या सुरुवातीला ही लस उपलब्ध होऊ शकेल.
काँग्रेसचे ज्येष्ठ नेते आणि खासदार जयराम रमेश यांच्या अध्यक्षतेखाली झालेल्या संसदीय समितीच्या बैठकीत या संदर्भात खुलासा करण्यात आला. कोरोना आणि इतर साथीच्या आजारांशी भविष्यातील व्यवहार करण्याची तयारी या बैठकीचा अजेंडा होता.
