जळगाव;- येथील जिल्हा सरकारी नोकरांची पतपेढी (ग.स.सोसायटी)चे संचालक मंडळ बरखास्त करण्यात आले असून नवीन प्रशासक मंडळाची नेमणूक करण्यात आली असून त्यांनी आजपासून पदभार स्वीकारला आहे अशी माहिती जिल्हा उपनिबंधक संतोष बिडवई यांनी दिली आहे.
ग.स. सोसायटीतील सत्ताधारी लोकसहकार गटाच्या पाच संचालकांनी विरोधी सहकार गटाला साथ देत अध्यक्ष मनोज पाटील यांच्याविरुद्ध बंड केले. दोन्ही गटाच्या १४ संचालकांनी २८ जानेवारीला राजीनामा दिला होता. सोसायटीच्या २१ पैकी १४ संचालकांनी राजीनामा दिल्यामुळे अध्यक्ष अल्पमतात आले होते. त्यामुळे संचालक मंडळ बरखास्तीची मागणी होती. ग.स.सोसायटीच्या १४ संचालकांनी दिलेल्या राजीनाम्याबाबत जिल्हा उपनिबंधकांकडून पडताळणी करण्यात आली. संबंधित संचालकांनी राजीनामे दिले असल्याचे समोर आल्याने ग.स.चे संचालक मंडळ बरखास्त झाले.
सहकार विभागाच्या प्राधिकृत मंडळामध्ये सहाय्यक निबंधक विजय गवळी, सहकार अधिकारी भाऊसाहेब महाले, लेखापरीक्षक प्रशांत विरकर यांचा समावेश आहे. प्राधिकृत अधिकारी मंडळातर्फ आजपासूनच ग.स.सोसायटीचा कारभार पाहण्यास सूरवात केली आहे.
