जळगाव;- तालुक्यातील ममुराबाद जवळ असणाऱ्या अरूणामाई फार्मसी कॉलेजजवळ एका भरधाव ट्रकने दुचाकीला जोरदार धडक दिल्याने असोद्याच्या मायलेकाचा उपचारादरम्यान मृत्यू झाल्याची घटना घडली. घटनेनंतर ट्रकचालाकाने पळ काढला. दिलीप अभिमन कोळी आणि त्यांची आई अलकाबाई अभिमन कोळी रा. असोदा ता. जळगाव असे मयताचे नाव आहे.
तालुक्यातील आसोदा येथील रहिवाशी दिलीप कोळी आणि त्यांची आई अलकाबाई कोळी हे दुचाकी क्रमांक- एमएच १९ डीसी ६६८७ ने १२ जून रोजी जळगावला दुचाकीने कामानिमित्त गेले. काम आटोपून सकाळी १० वाजता जळगाव ते ममूराबाद रस्त्याच्या दरम्यान असलेल्या अरूणामाई फार्मसी कॉलेज जवळून जात असतांना मागून येणाऱ्या भरधाव वेगाने येणारा ट्रक (एमएची १९ सीवाय ५४७३) ने जोरदार धडक दिली. यात दोघेजण गंभीर जखमी झाले. चालकाने ट्रक सोडून फरार झाला होता. या घटनेची माहिती नातेवाईकांना मिळाल्यानंतर दोघांना तातडीने खासगी रूग्णालयात दाखल करण्यात आले. औषधोपचार सुरू असतांना दोघांचा मृत्यू झाला आहे. विनोद कोळी यांच्या फिर्यादीवरून अज्ञात ट्रक चालकाविरोधात गुन्हा दाखल करण्यात आला आहे.
