माजी मुख्यमंत्री देवेंद्र फडणवीस यांच्या वक्तव्याचा निषेध
जळगाव ;- कोरोना महामारीच्या संकटकाळात आरोग्य यंत्रणांचे मनोबल खच्चीकरण करणारे वक्तव्य सातत्याने राजकीय नेत्यांकडून होत आहे. अशा वक्तव्यांमुळे डॉक्टर्स, परिचारक, स्टाफ हे व्यथित होत असल्याने त्याचा परिणाम रूग्णसेवेवर होण्याची शक्यता आहे. काल माजी मुख्यमंत्री देवेंद्र फडणवीस यांनी गोदावरी हॉस्पीटलमध्ये पैसे घेतले जात असल्याचा तथ्यहीन आरोप केला. या आरोपाचा गोदावरी नर्सिंग महाविद्यालयातील परिचारकांनी तीव्र निषेध केला असुन कामबंद आंदोलन करण्याचा इशारा दिला आहे.
जळगाव जिल्ह्यात कोरोना रूग्णांची संख्या दिवसेंदिवस वाढतच आहे. अशा परीस्थीतीत जिल्हा प्रशासनाने अधिग्रहीत केलेल्या डॉ. उल्हास पाटील वैद्यकीय महाविद्यालय व रूग्णालयाशी संबंधित निराधार आरोप राजकीय नेत्यांकडुन केले जात आहे. प्रत्यक्षात कुठलीही वस्तुस्थिती जाणून न घेता वारंवार डॉ. उल्हास पाटील रूग्णालयावर पैसे घेतल्याचे आरोप केले जात आहे. गेल्या दोन महिन्यांपासून डॉ. उल्हास पाटील वैद्यकीय महाविद्यालय व रूग्णालयातील डॉक्टर, परिचारीका, मेडीकल स्टोअर्स, वॉर्डबॉय, सफाई कामगार असे अनेेक जण स्वत:च्या घरापासून लांब राहुन रात्रंदिवस रूग्णसेवेसाठी राबत आहेत. अशा परिस्थीतीत त्यांना प्रोत्साहन देण्याऐवजी त्यांचे मनोबल खच्चीकरण करण्याचा प्रयत्न काही तथाकथित राजकीय नेत्यांकडुन केला जात आहे. स्वत:ची राजकीय पोळी भाजण्यासाठी आरोप करून रूग्णसेवेत नेत्यांकडुन अडथळे आणले जात आहे. तरी राजकीय नेत्यांनी वस्तुस्थिती जाणून न घेता निराधार आरोप केल्यास रूग्णालयातील सर्व कर्मचारी, परिचारिका हे कामबंद आंदोलन पुकारतील असा इशारा देण्यात आला आहे. तसेच काल माजी मुख्यमंत्री देवेंद्र फडणवीस यांनी कुठलीही माहिती न घेता पैसे घेतले जात असल्याचे केलेल्या वक्तव्याचाही परिचारकांनी तीव्र शब्दात निषेध व्यक्त केला आहे.
