पाचोरा तालुक्यातील नगरदेवळाजवळ घटना
जळगाव (प्रतिनिधी) : धावत्या रेल्वेतून खाली पडल्याने गंभीररीत्या जखमी होऊन ३० ते ३५ वर्षीय अनोळखी तरुणाचा मृत्यू झाला. ही घटना नगरदेवळा रेल्वे स्टेशनजवळ डाऊन रेल्वे लाईनच्या बाजूला सोमवार दिनांक १३ रोजी दुपारी २.१० वाजेपूर्वी घडली. लोहमार्ग पोलीस ठाण्यात अकस्मात मृत्यूची नोंद करण्यात आली.
नगरदेवळा रेल्वे स्टेशन परिसरात खांबा क्रमांक ३५३/२७-२९ दरम्यान सोमवारी दुपारी ही घटना घडली. धावत्या रेल्वेतून तरुण खाली पडल्यानंतर त्याच्या डोक्याला जबर मार लागला. मोठ्या प्रमाणात रक्तस्राव झाल्याने त्याचा जागीच मृत्यू झाला. ही खबर नगरदेवळा स्टेशन व्हाया पाचोरा स्टेशन मास्तर यांनी लोहमार्ग पोलिसांना दिली. एएसआय रामराव इंगळे हे सहकाऱ्यांना घेऊन घटनास्थळी रवाना झाले. रुग्णवाहिका मागवून मृतदेह पाचोरा ग्रामीण रुग्णालयात हलविला.
तरुणाच्या खिशात मनमाड ते खंडवा रेल्वे प्रवासाचे तिकीट पोलिसांना मिळून आले. त्याची ओळख पटविण्याच्या तपासाला पोलिसांनी गती दिली आहे. या तरुणाने लाल रंगाचा टी शर्ट तसेच निळ्या कलरची जिन्स पँट परिधान केली आहे. ओळख पटवून मृतदेह नातेवाइकांनी ताब्यात घ्यावा, असे आवाहन लोहमार्ग पोलिसांनी केले आहे. या प्रकरणी लोहमार्ग पोलीस ठाण्यात अकस्मात मृत्यूची नोंद करण्यात आली.
