बनावट नोटा प्रकरणातील तिसऱ्या संशयीताला पोलिसांकडून अटक

सावदा पोलीस स्टेशनची कारवाई

रावेर ( प्रतिनिधी ) – तालुक्यातील सावदा शहरात दि.१३ डिसेंबर शुक्रवार रोजी दुपारी २ वाजेच्या सुमारास सावदा पोलिसांनी सावदा शहरातील ख्वाजा नगर मधील शेख आरिफ शेख फारुख व अझरखान अय्युब खान या दोघांना अटक करून त्याच्या कडून १०० रुपयांच्या ७६ बनावट चलनी नोटा जप्त केल्या होत्या. या दोघांना बनावट नोटा विक्री करणारा डीलर तिसरा आरोपी आवेश खान रा.भुसावळ याला सावदा पोलिसांनी भुसावळ येथून अटक केली असून त्याला कोर्टात हजर केले असता त्याला दि.१६ मंगळवार पर्यंत पोलिस कस्टडी देण्यात आली आहे.

शुक्रवार दि.१३ डिसेंबरला दुपारी २ वाजेच्या सुमारास सावदा पोलिसांनी शहरातील ख्वाजा नगर मधील शेख आरिफ शेख फारुख व अझरखान अय्युब खान या दोघांना बनावट चलनी नोटा बाळगल्या प्रकरणी अटक केली होती. त्यांनी भुसावळ येथील आवेश नामक व्यक्ती कडून ४ हजार रुपयांना १० हजारांच्या बनावट नोटा विकत घेतल्याचे पोलिस तपासात समोर आले. मात्र आवेश फरार असल्याने त्याने त्या बनावट चलनी नोटा कुठून आणल्या या बाबत खुलासा होत नव्हता.

सावदा पोलिसांनी सापळा रचून आवेशला भुसावळ येथून शिताफीने अटक केली. त्याला न्यायालयात हजर केले असता त्याला मंगळवार पर्यंत पोलिस कस्टडी देण्यात आली आहे.