बोदवड तालुक्यातील चिंचखेड प्रगणे गावातील घटना
बोदवड (प्रतिनिधी) : तालुक्यातील चिंचखेड प्रगणे येथील सरपंच अक्काबाई नंदू पाटील यांचा मुलगा शुभम नंदू पाटील (वय २१) हा मंगळवारी दुपारी दुर्गादेवी मूर्ती विसर्जनासाठी गेला असता गावाजवळ असलेल्या नदीत दुपारी बुडाला. सात तासांनी मध्यरात्री त्याचा मृतदेह आढळला. बोदवड पोलीस स्टेशनला अकस्मात मृत्यूची नोंद करण्यात आली आहे.
मंगळवारी दुपारी चार वाजता देवीच्या मूर्तीचे विसर्जन करण्यासाठी काही मित्रांसह शुभम हा नदीच्या पाण्यात उतरला होता. पाण्याचा अंदाज न आल्याने शुभम बुडाला. बराच वेळ झाला तरी शुभम दिसत नसल्याने त्याचा शोधाशोध सुरू झाला. तो रात्री नऊ वाजेपर्यंतही नदीत सापडला नाही. त्यामुळे त्याच्या शोधासाठी नांदुरा, जि. बुलढाणा येथून एनडीआरएफचे पथक बोलविण्यात आले. हे पथक आल्यानंतर सात तासांच्या अथक प्रयत्नांनंतर शुभमचा मृतदेह मध्यरात्री आढळला. कुटुंबीयांनी मृतदेह पाहून आक्रोश केला होता. बोदवड पोलिसांनी घटनेची नोंद पोलीस स्टेशनला केली आहे.
