पोलिसांसह नातेवाईकांना बोलावून केले सुपूर्द
अमळनेर (प्रतिनिधी) : छत्तीसगड राज्यातील बिलासपूर जिल्ह्यातील पाचपेडी, मल्हार येथून प्रियकरासह पळून गेलेल्या अल्पवयीन मुलीला अमळनेर रेल्वे संरक्षण दलाने ताब्यात घेतले. त्यानंतर दोन्ही प्रेमीयुगुलांना त्यांच्या कुटुंबीयांच्या ताब्यात देण्यात आले.
दिनांक ११ सप्टेंबर रोजी पोलीस उपनिरीक्षक खेल सिंग, सहायक उपनिरीक्षक कुलभूषण सिंग चौहान आणि लेडी कॉस्टेबल शिरोमणी डांगी हे अमळनेर स्थानकात गस्त घालत असताना स्थानकासमोर एक मुलगा आणि एक अल्पवयीन मुलगी संशयास्पद अवस्थेत बसलेले दिसले. चौकशी केली असता समाधानकारक उत्तर मिळाले नाही. यामुळे दोघांना आरपीएफ पोलीस ठाण्यात आणून त्यांची कसून चौकशी केल्यानंतर या मुलाने अल्पवयीन मुलीला आमिष दाखवून घरातून पळवून नेल्याचे सांगितले.
तपास सुरू असताना संबंधित पोलिस ठाण्याशी तातडीने संपर्क साधून दोघांची छायाचित्रे व्हॉट्स अॅपद्वारे प्रसिद्ध करण्यात आली. पोलीस अधिकारी राकेश तांडे यांनी अल्पवयीन मुलाच्या वडिलांमार्फत ९ सप्टेंबर रोजी पाचपेडी पोलीस ठाण्यात मुलाविरुद्ध एफआयआर दाखल केला. अधिक चौकशीदरम्यान अल्पवयीन मुलीने तिचे नाव सांगितले. तिचे वय फक्त १३ वर्षे ८ महिने असून ती विद्याडीह टांगेर, बिडीयाडी, टांगेर, भरारी येथील रहिवासी आहे.
प्रभूकुमार रामकुमार (२०) असे पळून गेलेल्या मुलाचे नाव असून तोही त्याच ठिकाणचा रहिवासी आहे. पोलीस अधिकाऱ्याने हे प्रकरण अत्यंत गंभीर असल्याचे सांगून दोघांनाही अमळनेर येथेच ठेवण्यास सांगितले. एवढेच नाही तर १३ सप्टेंबर रोजी पोलिसांचे पथक मुलीच्या कुटुंबीयांसह अमळनेर आरपीएफमध्ये पोहोचले आणि दोघांनाही सुखरूप ताब्यात घेतले. त्यानंतर संपूर्ण टीम बिलासपूरला रवाना झाली. या गुन्ह्यात अमळनेर आरपीएफने दिलेल्या सहकार्याबद्दल छत्तीसगड पोलिसांनी आभार व्यक्त केले आहेत.
