जामनेर शहरातील घटना
जामनेर (प्रतिनिधी) : शहरामध्ये नगरपालिका समोरील चौकात आयोजित करण्यात आलेल्या एका दहीहंडी महोत्सवातील दहीहंडी अंगावर पडल्याने दोन ते तीन तरुण जखमी झाल्याची धक्कादायक घटना शुक्रवार दि. ३० ऑगस्ट रोजी संध्याकाळी घडली आहे. जखमी तरुणांवर खाजगी रुग्णालयात उपचार सुरू असल्याची माहिती मिळाली आहे.
जामनेर शहरांमध्ये भारतीय जनता पक्षाच्या वतीने शुक्रवारी ३० ऑगस्ट रोजी संध्याकाळी दहीहंडी महोत्सवाचे आयोजन करण्यात आले होते. या महोत्सवाला काही अभिनेत्री प्रार्थना बेहेरे, हास्य कलाकार शाम राजपूत , प्रभाकर मोरे, नृत्यांगना रिचा अग्निहोत्री हे आले होते. त्याच वेळेला क्रेनच्या सहाय्याने दहीहंडी उंचावर लावण्याचे काम सुरू होते. दहीहंडी सजावट करून त्यांच्या साह्याने उंचावर नेत असताना अचानक दहीहंडीसह त्याची सजावट जोरात खाली पडल्याने उपस्थित दोन ते तीन जण जखमी झाले. त्यांना तात्काळ खाजगी रुग्णालयात उपचारासाठी दाखल करण्यात आले होते. दरम्यान या घटनेमुळे तरुणांची धावपळ उडाली होती.
