भुसावळ (प्रतिनिधी ) ;- जुन्या वादातून माजी नगरसेवक संतोष बारसे आणि सुनिल राखुंडे यांच्यावर गोळीबार करून हत्या करण्यात आल्याची घटनाशहरातील जुना सातारा भागात २९ मे रोजी रात्री ३० वाजता घडली होती. याप्रकरणी भुसावळ शहर पोलीस ठाण्यात गुन्हा दाखल करण्यात आला होता. या गुन्ह्यात आतापर्यंत सहा संशयित आरोपींना अटक करण्यात आली आहे. यातील सातवा फरार आरोपी सोनू रायसिंग पंडीत रा. वाल्मिक नगर, भुसावळ याला २७ जून रोजी रात्री ११ वाजता भुसावळ बाजार सामिती आवारातून अटक करण्यात आली आहे.
भुसावळ शहराचे माजी नगरसेवक संतोष बारसे व सुनील राखुंडे हे २९ मे रोजी रात्री साडेनऊच्या दरम्यान भुसावळ शहरातील जुना सातारा रोडवरून रस्त्याने कारमधून येत होते. त्यावेळी जुन्या वादातून राजेश सूर्यवंशी व बंटी पथरोड यांच्या सांगण्यावरून काही हल्लेखोरांनी त्यांच्या कारचा रस्ता अडवून त्यांच्यावर गोळीबार केल्याने दोघांचा जागीच मृत्यू झाला होता. या घटनेमुळे भुसावळ शहरात खळबळ उडाली होती. याप्रकरणी भुसावळ शहर पोलीस ठाण्यात गुन्हा दाखल करण्यात आला होता. या दुहेरी हत्याकांडाच्या गुन्ह्यात पोलीसांनी आतापर्यंत सहा जणांना अटक करण्यात आली आहे. तर इतर मारेकरी फरार झाले आहे.
फरार सोनू रायसिंग पंडित रा. वाल्मीक नगर, भुसावळ हा आपल्या नातेवाईकांना भेटण्यासाठी भुसावळ शहरातील कृषी बाजार समितीच्या आवारात येत असल्याची गोपनीय माहिती भुसावळ शहर पोलीस ठाण्याचे पोलीस निरीक्षक गजानन पडघन यांना माहिती मिळाली. त्यानुसार त्यांनी पथकाला कारवाई करण्याच्या सूचना दिल्या. गुरुवारी २७ जून रोजी रात्री ११ वाजता पथकाने सापळा रचून फरार आरोपी सोनू पंडित याला शिताफिने अटक केली. या गुन्ह्यात अटक केलेल्या आरोपींची संख्या सातवर पोहचली आहे.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, डीवायएसपी कृष्णात पिंगळे यांच्या सुचनेनुसार भुसावळ बाजारपेठ पोलीस ठाण्याचे पोलीस निरीक्षक गजानन पडघन यांच्या मार्गदर्शनाखाली पोलीस ठाण्याचे पोहेकॉ रमण सुरळकर, उमाकांत पाटील, प्रशांत परदेशी, अमर आढळे, प्रशांत लाड, प्रशांत सोनार, दिनेश कापडणे, राहुल भोई यांनी केली आहे.तपास पोलीस निरीक्षक संदीप रणदिवे करीत आहे.
================================
