संतप्त नातेवाईकांनी मृतदेह आणला तहसील कार्यालयात
चौघांना अटक, अमळनेर तालुक्यातील शिरूड येथील घटना
अमळनेर (प्रतिनिधी) : नेहमीच्या मारहाणीला कंटाळून तरुणाने स्वतःच्या अंगावर पेट्रोल टाकून पेटवून घेत आत्महत्या करण्याचा प्रयत्न केला होता. अखेर उपचारादरम्यान त्याचा मृत्यू झाला आहे. घटना २५ रोजी दुपारी ३ वाजेच्या सुमारास शिरूड येथे घडली. मृतासह रुग्णवाहिका बुधवारी थेट अमळनेर तहसील कार्यालय आवारात नातेवाईकांनी आणली. आत्महत्येस प्रवृत्त करणाऱ्यांवर जोपर्यंत गुन्हा दाखल होऊन त्यांना अटक होत नाही, रुग्णवाहिका येथून हलणार नाही असा पवित्रा नातेवाइकांनी घेतला. पोलिस निरीक्षकांनी योग्य तो न्याय देऊ असे सांगितले. अखेर चौघांवर गुन्हा दाखल होऊन त्यांना अटक करण्यात आली आहे.
विलास भाईदास घिसाडी (वय ३५) असे मृताचे नाव आहे. तो कुटुंबासमवेत शिरूड गावी राहत होता. त्याच्या घराच्या मागील बाजूस असलेला वराह पालनाचा व्यवसाय आहे. यांच्या घराच्या मागच्या बाजूला रामबाई भुरा वडर, विनोद भुरा वडर, प्रवीण भुरा वडर, सुदाम भुरा वडर हे लोक राहतात. घिसाडी यांची मोकाट डुकरे आजूबाजूच्या घरांमध्ये घुसून अन्न धान्याची नासाडी करतात म्हणून त्यांच्यात वाद होते.
दिनांक २५ रोजी सकाळी विलास कन्हेरे फापोरे येथे गेले होते. दुपारी तीन वाजता विनोद वडर याच्या डुकरांनी पुन्हा अन्न धान्याची नासाडी केली म्हणून विलासला चौघांनी लाठ्या काठ्यांनी मारहाण केली. चौघांच्या मानसिक त्रासाला कंटाळून विलास याने स्वतःच्या अंगावर रॉकेल टाकून आत्महत्या करण्याचा प्रयत्न केला.
त्याला उपचारासाठी धुळे जिल्हा रुग्णालयात दाखल केले असता त्याने धुळे पोलिसांना चौघांविरुद्ध जबाब दिला. उपचारादरम्यान त्याचा मृत्यू झाला. मयताच्या नातेवाईकांनी दिनांक २६ रोजी शव तहसील कार्यालयात आणले. मात्र यावेळी शिक्षक मतदार संघाचे मतदान सुरू असल्याने शव आणणारी रुग्णवाहिका बाहेरच थांबवण्यात आली. आत्महत्येस प्रवृत्त करणाऱ्याविरुद्ध गुन्हा दाखल करा अशी मागणी लावून धरली. उपविभागीय अधिकारी महादेव खेडकर यांनी पोलीस निरीक्षक विकास देवरे यांच्याशी चर्चा करून गुन्हा दाखल करून चौकशी करण्याच्या सूचना दिल्यात.
याप्रकरणी गणेश भाईदास घिसाडी यांच्या फिर्यादीवरून रामबाई भुरा वडर, विनोद भुरा वडर, प्रवीण भुरा वडर व सुदाम भुरा वडर यांच्याविरुद्ध गुन्हा दाखल करण्यात आला असून पैकी विनोद, प्रवीण व सुदाम यांना अटक केली आहे. तपास पोलीस उपनिरीक्षक अक्षदा इंगळे करीत आहेत.
