क्रेनच्या सहाय्याने कंटेनर हटवण्याचे प्रयत्न
शिरसोली ते वावडदे दरम्यान घडली घटना
जळगाव (प्रतिनिधी) : तालुक्यातील शिरसोली ते वावडदा दरम्यान एक अवजड कंटेनर रस्त्याचा अंदाज न आल्यामुळे रस्त्याच्या खाली उतरून अपघात झाला. मात्र त्याचा अर्धा भाग रस्त्याच्या खाली व अर्धा रस्त्यावर असल्यामुळे महामार्गावर वाहतूक विस्कळीत झाली. गुरुवारी दि. २० जून रोजी रात्री ९ वाजेच्या सुमारास ही घटना घडली. दरम्यान रात्री एक वाजेपर्यंत क्रेन येईपर्यंत वाहतूक सुरळीत करण्याचे काम एमआयडीसी पोलीस स्टेशनचे कर्मचारी करीत होते.
सदरहू कंटेनर क्रमांक (एम एच १९ झेड ४२०७) हे जळगाव वरून मुंबईकडे निघाले होते. सर्व कंटेनरमध्ये माल भरलेला होता. शिरसोली ते वावडदा दरम्यान हॉटेल फौजी जवळ चालकाला रस्त्याचा अंदाज आला नाही. त्यामुळे ते रस्त्याच्या खाली उतरले. मात्र त्याचे पुढील धूड रस्त्याच्या खाली तर मागील भाग हा महामार्गावरच अडकून पडला. त्यामुळे इतर वाहनांना जाण्या येण्यासाठी जवळजवळ रस्ता बंदच झाला.
घटनेमध्ये कोणीही जखमी झाले नाही अथवा जीवित हानी झालेली नाही. एमआयडीसी पोलीस स्टेशनला घटनेची माहिती मिळताच त्यांनी घटनास्थळी धाव घेतली. सदरहू कंटेनर हा हटवता येत नव्हता. त्यामुळे दोन क्रेनची मदत घेण्यात आली आहे. रात्री बारा वाजेपर्यंत क्रेन येण्याची पोलीस वाट पाहत होते. दरम्यान वाहतूक सुरळीत करण्यासाठी एमआयडीसी पोलीस स्टेशनचे कर्मचारी प्रयत्न करत होते. घटनास्थळी पंचक्रोशीतील ग्रामस्थ देखील जमा झाले होते. रात्री बारा वाजेला क्रेन आल्या नंतर दिड वाजेला रस्ता सुरळीत करण्यात आला
