अन्न व औषध प्रशासनाकडून धडाका
जळगाव (प्रतिनिधी) : शहरातील मानसिंग मार्केट येथे प्रतिबंधित असलेला पानमसाला, तंबाखू साठवणूक केलेल्या दुकानावर अन्न व औषध प्रशासनाने कारवाई केली. कारवाईत ४ लाख १७ हजार २८० रुपयांचा साठा जप्त करण्यात आला. या प्रकरणी दुकानमालक भरत विनायक बाविस्कर (४३, रा. पिंप्राळ रोड) याच्याविरुद्ध गुन्हा दाखल करण्यात आला आहे.
मानसिंग मार्केटमध्ये प्रतिबंधित पानमसाला, तंबाखू, सुगंधित सुपारी विक्री होत असल्याची माहिती अन्न व औषध प्रशासन विभागाला मिळाली. त्यानुसार पथक पंकज ट्रेडर्स अँड जनरल या दुकानावर पोहचले. तेथे दुकानात पानमसाला, तंबाखू, सुपारी यांचे पाकीट आढळून आले. त्यांची किंमत ४लाख १७ हजार २८० असून याचे नमुने घेऊन साठा जप्त करण्यात आला. प्रकरणी अन्न सुरक्षा अधिकारी शरद पवार यांनी शहर पोलिस ठाण्यात फिर्याद दिली. त्यावरून पंकज ट्रेडर्स अँड जनरल या दुकानचे मालक भरत बाविस्कर याच्याविरुद्ध गुन्हा दाखल करण्यात आला आहे.
