वाहनात बड्या घराण्यातील तरुण
आशासेविकांसह चौघांवर शोकाकुल वातावरणात अंत्यसंस्कार
जळगाव (प्रतिनिधी) : तालुक्यातील रामदेववाडी येथे मंगळवारी दि. ७ मे रोजी झालेल्या भीषण अपघातात आशासेविकांसह तीन बालकांचा मृत्यू झाल्याप्रकरणी एमआयडीसी पोलीस स्टेशनला कारचालकाविरुद्ध सदोष मनुष्यवधाचा गुन्हा दाखल करण्यात आला आहे. अपघात करणाऱ्या कारमध्ये बड्या घराण्यातील तरुण असल्याचे फिर्यादीत नमूद करण्यात आले आहे. दरम्यान, पोलीस तपास सुरु असून अद्यापि कोणाला अटक करण्यात आलेली नाही.
तालुक्यातील रामदेववाडी जवळ पठारवाडी परिसरात आशा सेविका राणी उर्फ वच्छलाबाई सरदार चव्हाण (वय ३०) यांच्या दुचाकीला भरधाव कारने जोरदार धडक दिली होती. या धडकेत राणी चव्हाण यांच्यासह त्यांची मुले सोमेश सरदार चव्हाण (वय २), सोहन सरदार चव्हाण (वय ७) यांचा मृत्यू झाला होता. तर सोबत असलेला भाचा लक्ष्मण पदमसिंग नाईक (वय १६) हा गंभीर जखमी झाला होता. मध्यरात्री १२ वाजता उपचारादरम्यान लक्ष्मण नाईक याचा मृत्यू झाला आहे. या घटनेप्रकरणी एमआयडीसी पोलीस स्टेशनला मयत वच्छलाबाई चव्हाण यांचे भाऊ राजेश अलसिंग चव्हाण (वय ३०, रा. रामदेववाडी) यांच्या फिर्यादीवरून गुन्हा दाखल करण्यात आला आहे.
फिर्यादीत म्हटले आहे की, त्यांची बहीण वच्छलाबाई (वय २७,रा. शिरसोली प्र. न. ता. जळगाव) ह्या रामदेववाडी येथे आशा सेविका म्हणून काम करतात. मंगळवारी संध्याकाळी त्या कामकाज आटोपून शिरसोली येथे इलेकट्रीक स्कुटर (एमएच १९ ईई ८९२५) ने परत जात असताना समोरून निळ्या रंगाची इको स्पोर्ट्स कारने (एमएच १९ सीव्ही ६७६७) ने विरुद्ध दिशेने येऊन वच्छलाबाई यांच्या वाहनाला जोरदार धडक दिली. या भीषण अपघातात वच्छलाबाई चव्हाण यांच्यासह त्यांचे दोन मुले सोमेश, सोहम व भाचा लक्ष्मण यांचा मृत्यू झाला आहे. या चौघांच्या मृत्यूप्रकरणी इकोकार वरील चालकाविरुद्ध फिर्यादीने फिर्याद दिली आहे. दरम्यान, या कारमध्ये धनाढ्य घरातील अर्णव अभिषेक कौल, जिल्हा बँकेचे चेअरमन संजय पवार यांचे चिरंजीव अखिलेश संजय पवार यांच्यासह दोन अनोळखी इसम हे असल्याचेही फिर्यादीत नमूद करण्यात आले आहे.
