जळगावातील घटना, तालुक्यातील वडनगरी येथे शोककळा
जळगाव (प्रतिनिधी) : तालुक्यातील वडनगरी येथील २६ वर्षीय दिव्यांग तरूणाने धावत्या रेल्वेसमोर येवून आत्महत्या केल्याची धक्कादायक घटना रविवारी ७ एप्रिल रोजी पहाटे ३ वाजेच्या सुमारास शहरातील समृध्दी अपार्टमेंट समोर घडली आहे. याप्रकरणी जळगाव शहर पोलीस ठाण्यात अकस्मात मृत्यूची नेांद करण्यात आली आहे.
भगवान मणिलाल चौधरी (वय २६ रा. वडनगरी, ता. जळगाव) असे मयत दिव्यांग तरूणाचे नाव आहे. तालुक्यातील वडनगरी येथे भगवान हा तरूण आपल्या आईवडील आणि भाऊ सोबत वास्तव्याला होता. तो दोन्ही पायांनी अपंग होता. टेन्ट हाऊस चालवून उदरनिर्वाह करत होता. दरम्यान, शनिवारी ६ एप्रिल रोजी सायंकाळी ६ वाजता तो कामानिमित्त जात असल्याचे सांगून घरातून निघून गेला होता. रविवारी ७ एप्रिल रोजी पहाटे ३ वाजता शहरातील समृध्दी अपार्टमेंटसमोरील रेल्वे रूळावर धावत्या रेल्वे समोर उभा राहून आत्महत्या केली. आत्महत्या करण्याचे कारण समोर आले नाही.
सोबत असलेल्या कागदपत्राच्या आधारे त्यांची ओळख पटली. शहर पोलीसांनी घटनास्थळी धाव घेवून मृतदेह शासकीय वैद्यकीय महाविद्यालयात रवाना करण्यात आला. याप्रकरणी जळगाव शहर पोलीस ठाण्यात अकस्मात मृत्यूची नोंद करण्यात आली आहे. त्यांच्या पश्चात आई निर्जला, वडील मणिलाल गंभीर चौधरी आणि लहान भाऊ पवन असा परिवार आहे. पुढील तपास पोहेकॉ रविंद सोनार हे करीत आहे.
