जळगाव शहरातील घटना
जळगाव (प्रतिनिधी) : शहरातील एका तरुणाला काहीही कारण नसताना दोन जणांनी बेदम मारहाण केली. तसेच चॉपर व काचेच्या बाटलीनेदेखील डोक्यावर मारून गंभीर जखमी केले. ही घटना दि. १ एप्रिल रोजी शिवशंकर कॉलनीत घडली. याप्रकरणी शहर पोलिसात गुन्हा दाखल करण्यात आला आहे.
शहतील इंद्रप्रस्थ नगरातील शिवशंकर कॉलनीत स्वामी राजेंद्र पोतदार (वय ३१) हा तरुण राहायला असून तो सुवर्ण कारागीर आहे. दि. १ एप्रिल रोजी रात्री साडेदहा वाजेच्या सुमारास त्याच परिसरात राहणारे दीपक भोई व युवराज भोई यांनी काहीही एक कारण नसतांना स्वामी पोतदार याला मारहाण करण्यास सुरुवात केली. यावेळी दीपक याने त्याच्याजवळील चॉपरने तर युवराज याने काचेची बाटली स्वामी व त्याच्या भावाच्या डोक्यावर मारुन त्यांना गंभीर जखमी केले. तसेच त्यांच्या आईला देखील मारहाण केली. त्यांनी लागलीच शहर पोलिसात तक्रार दिली. त्यानुसार दीपक दगडू भोई व युवराज दगडू भोई (दोघ रा. शिवशंकर कॉलनी) यांच्याविरुद्ध गुन्हा दाखल करण्यात आला आहे. पुढील तपास पोहेकॉ विरेंद्र शिंदे हे करीत आहे.
