सिव्हिजिलद्वारे ३४ तक्रारी प्राप्त
जळगाव (प्रतिनिधी) :- जिल्ह्यातील रावेर व जळगाव लोकसभा मतदारसंघात आदर्श आचारसंहिता संदर्भात प्रशासनाने विविध माध्यमातून कार्यवाही सुरू केली असून त्यात शस्त्र जप्ती,रोख रक्कम, दारू, ड्रग्ज, मौल्यवान धातू याबाबतची तपासणी सुरू आहे.
आचासंहिता कालावधीत राज्य उत्पादन शुल्क विभागाने एकूण ७८ गुन्हे दाखल झाले असून ३३ हजार ५०६ लिटर मुद्देमाल जप्त करण्यात आला आहे. मुद्देमालाची किंमत ११ लाख ६९ हजार ८२५ आहे. व्होटर हेल्पलाइनद्वारे प्राप्त झालेल्या ५३ कॉलचे समाधान करण्यात आले आहे. एकूण ५३ कॉल निकाली काढण्यात आले आहेत. वोटर हेल्पलाइन वर प्राप्त होणाऱ्या कॉल्स पैकी बहुतांश तक्रार या मतदान कार्ड न मिळाल्याबाबतीत असल्याने कॉल करणाऱ्या नागरिकांना संबंधित निवडणूक अधिकारी तसेच तहसील कार्यालयांशी संपर्क साधण्याचे सूचित करण्यात आले आहे.
सीव्हिजिल अर्जाद्वारे ३४ तक्रारी प्राप्त झाल्या आहेत. प्राप्त झालेल्या प्रमुख तक्रारी परवानगीशिवाय पोस्टर्स/बॅनरशी संबंधित आहेत. प्राप्त बहुतांशी तक्रारी या ठिकठिकाणी लावण्यात आलेले पोस्टर बॅनर्स वॉल पेंटिंग याच्याशी संबंधित असल्याने संबंधित प्राप्त तक्रारींची दखल घेत संबंधित विभागांना सुचित करण्यात आले आहे. मीडियासंदर्भात आता पर्यंत एकूण २ तक्रारी प्राप्त झालेल्या आहेत. त्यापैकी २ तक्रारी निकाली काढण्यात आल्या आहेत.
शस्त्र जप्ती
जिल्ह्यात एकूण १२४६ परवनाधारक शस्त्र आहेत. निवडणुकीच्या पार्श्वभूमीवर शस्त्रे जमा करण्याचे आदेश जिल्हाधिकारी आयुष प्रसाद यांनी दि.२६ मार्च रोजी दिले आहेत. जिल्ह्यात आतापर्यंत ५ विना परवानाशस्त्रे जप्त करण्यात आले आहेत. सीआरपीसीच्या प्रतिबंधात्मक कलमांतर्गत १ हजार ७३ प्रकरणे दाखल करण्यात आली आहेत. सीआरपीसी अंतर्गत आतापर्यंत ७८६ जणांना अटक करण्यात आली आहे.
