भुसावळ तालुक्यातील घटना
भुसावळ (प्रतिनिधी) :- हॉटेलमध्ये जेवणाचे पैसे मागितल्याच्या वादातून तरुणावर चाकूहल्ला करण्यात आला तर दोघांना शिविगाळ करीत मारहाण करण्यात आली. ही घटना नववर्षाच्या दिवशी १ रोजी रात्री १२ वाजता घडली. याप्रकरणी दोघांविरोधात भुसावळ बाजारपेठ पोलिसात गुन्हा दाखल करण्यात आला.
यश रघुनाथ तपकिरे (अयोध्या नगर, शांतीनिकेतन जवळ, जळगाव) यांनी फिर्याद दिली आहे. शहरातील उंट मोहल्ला भागातील हॉटेल रूचीमध्ये दोघे संशयित जेवणासाठी आले होते. त्यांना जेवण झाल्यानंतर बिल मागितल्याचा राग आला. फिर्यादीस प्रदीप कोळी याने शिविगाळ करीत धक्काबुक्की केली तर दुसरा संशयित विजय पवार याने फिर्यादी व महेश जाधव तसेच जसवंतसिंग राजपूत यांना चापटा-बुक्क्यांनी मारहाण करीत ठार मारण्याची धमकी दिली.
तसेंच, चाकूने जसवंत सिंग यांच्या उजव्या डोळ्यावर वार् केला. या हल्ल्याने डोळ्याला गंभीर दुखापत झाली तसेच डाव्या हाताच्या बोटालाही दुखापत झाली. तपास सहाय्यक निरीक्षक हरीष भोये करीत आहेत.
