पुढील महिन्यात होणाऱ्या बैठकीत समस्यांवर होणार चर्चा
जळगाव (प्रतिनिधी) :- सफाई कर्मचारी संघटनेच्या समस्या व न्याय हक्काबाबत राज्यध्यक्ष नागेज कंडारे यांनी जिल्हाधिकाऱ्यांना निवेदन देण्यात आले होते. या निवेदनाची जिल्हाधिकारी आयुष प्रसाद यांनी तात्काळ दखल घेत याबाबत बैठकीचे पत्र सफाई कामगार नेते तथा राज्यध्यक्ष नागेज कंडारे यांना दिले आहे.
अखिल महाराष्ट्र सफाई कामगार व चतुर्थ श्रेणी कर्मचारी संघटनेच्या वतीने राज्यध्यक्ष नागेज कंडारे यांनी दि. २२ डिसेंबर रोजी जळगाव जिल्हाधिकारी आयुष प्रसाद यांना जळगाव जिल्ह्यातील सफाई कर्मचारी यांच्या समस्या व न्याय हक्काबाबत निवेदन दिले होते. तसेच संघटनेचे राज्य कार्याध्यक्ष डॉ. रेखाताई बहनवाल यांनी भ्रमणध्वनीद्वारे विस्तृत चर्चा केली होती.
लवकरात लवकर संघटनेची बैठक घेण्यात यावी अशी विनंती देखील जिल्हाधिकाऱ्यांकडे केली होती. याची जिल्हाधिकारी आयुष प्रसाद यांनी तातडीने दखल घेत दि. ९ जानेवारी रोजी सकाळी ११ वाजेला बैठक आयोजित केली आहे. याबाबतचे पत्र राज्यध्यक्ष नागेज कंडारे यांना देऊन कळविण्यात आले आहे.
जळगाव जिल्ह्यातील सफाई कामगारांच्या समस्या लवकरच मुक्त होतील असे आश्वासन जिल्हाधिकाऱ्यांनी दिले आहे.
सफाई कामगारांच्या मागण्या नेमक्या काय आहे ?
1. डॉ. बाबासाहेब आंबेडकर श्रमसाफल्य आवास योजनेअंतर्गत सफाई कामगारांना मालकी हक्काने घरे देण्यात यावी.2. १ नोव्हेंबर २००५ नंतर शासन सेवेत नियुक्त झालेल्या सफाई कामगारांना शासन निर्णय दिनांक ३१ मार्च २०२३ नुसार लाभ अदा करण्यात यावा.
3. सफाई कामगार यांना मुकादम व कनिष्ठ लिपिक या पदावर शैक्षणिक पात्रतेनुसार पदोन्नती देण्यात यावी.
4. लाड पागे समितीच्या शासनमान्य धोरणानुसार वारसा हक्काने ३० दिवसाच्या आत वारसाला नियुक्ती आदेश देण्यात यावी.
5. नवनिर्मित नगरपंचायती मधील ग्रामपंचायत कालावधीतील सफाई कामगारांचे समावेशन होण्याकरिता प्रस्ताव तात्काळ वरिष्ठ कार्याकडे सादर करण्यात यावा.
6. कंत्राटी कामगारांना शासनाच्या नियमाप्रमाणे किमान वेतन व इतर सुविधा तात्काळ लागू करण्यात यावे.
7. सफाई कामगारांना नगरपरिषदेने बांधून दिलेली घरे मालकी हक्काने नावे करण्यात यावी.
8. सफाई कामगारांना कामाचे साहित्य व ऋतुमानानुसार कपडे देण्यात यावे.
9. सफाई कामगारांच्या सेवा पुस्तक अद्ययावत करून दुय्यम प्रत त्यांना देण्यात यावी.
10. प्रत्येक नगरपरिषद आस्थापनेवर महिला विशाखा समितीची स्थापना करून त्यामध्ये सफाई कामगार महिलेचा समावेश करण्यात यावा.
11. सफाई कामगारांचा वैद्यकीय विमा काढण्यात यावा.
