भडगाव तालुक्यातील कजगाव येथील घटना
भडगाव (प्रतिनिधी) :- तालुक्यातील कजगाव येथील अल्पभूधारक कर्जबाजारी शेतकऱ्याने आत्महत्या केल्याची धक्कादायक घटना शुक्रवारी १७ नोव्हेंबर रोजी दुपारी उघडकीस आली आहे. याप्रकरणी भडगाव पोलीस स्टेशनला अकस्मात मृत्यूची नोंद करण्यात आली असून कजगाव मध्ये हळहळ व्यक्त करण्यात येत आहे.
शिवाजी नथ्थु महाजन (वय ४५ वर्ष, सावता माळी नगर, कजगाव) असे ह्या आत्महत्या केलेल्या शेतकऱ्यांचे नाव आहे. त्यांच्याकडे दोन एकर शेती असून त्यांच्या कुटुंबाचा उदरनिर्वाह शेतीवरच अवलंबून होता. त्यांच्या पश्चात पत्नी,आई,दोन मुली,मुलगा, दोन भाऊ,असा परिवार आहे.
कजगावात शुक्रवारी दुपारी राहत्या घरी त्यांनी गळफास घेऊन आत्महत्या केली. घटना उघडकीस येताच आजूबाजूच्या नागरिकांनी त्यांना ग्रामीण रुग्णालयात दाखल केले. तेथे वैद्यकीय अधिकाऱ्यांनी त्यांना मयत घोषित केले. यानंतर कुटुंबीयांनी मन हेलावणारा आक्रोश केला. दरम्यान कष्टाळू शेतकऱ्याने आत्महत्या केल्यामुळे कजगाव शोकाकुल झाले असून संध्याकाळी शेतकऱ्यावर अंत्यसंस्कार करण्यात आले. भडगाव पोलीस स्टेशनला अकस्मात मृत्यूची नोंद करण्यात आली आहे.
