कामाचे आदेश नसताना बांधकाम पूर्णत्वास : दशरथ महाजन यांची तक्रार
जळगाव (प्रतिनिधी) :- एरंडोल नगरपरिषद हद्दीतील व्यायाम शाळेतील कुस्ती आखाडा बांधकामाच्या फेर जाहीर निविदेबाबत जिल्हाधिकारी यांचेकडे माजी नगराध्यक्ष दशरथ महाजन यांनी तक्रार केली आहे. एरंडोल नगरपालिका यांच्या वतीने निविदा प्रदर्शित झाली असून सदर निविदेची अंदाजित रक्कम ९,९५,८२९/- इतकी आहे. उपरोक्त निविदेसाठी अर्जाची अंतिम तारीख ०७ नोव्हेंबर असून सदर निविदेसंदर्भात कोणत्याही निविदाकाराला स्वीय सहाय्यक कवा कंत्राटदाराला कार्यारंभ आदेश नगरपालिकेच्या वतीने दिलेले नाहीत. असे असून देखील एका खाजगी कंत्राटदाराने सदर जागेवरील व्यायाम शाळेचे बांधकाम अर्धे अधिक पूर्ण केले आहे. कार्यारंभ आदेश नसताना किंवा निविदा प्रक्रिया पार न पाडता सदर काम मुख्याधिकारी यांच्याशी संगनमताने केले जात आहे.
याबाबत दशरथ महाजन यांनी जळगावात पत्रकार परिषद घेऊन माहिती दिली. यावेळी शिवसेना ठाकरे गटाचे जिल्हाप्रमुख हर्षल माने उपस्थित होते. सदर इसमाने कोणताही कार्यारंभ आदेश नसताना सदरचे काम अर्धे अधिक पूर्ण केले असून सदरच्या कामात मुख्याधिकारी विकास रमेश नवाळे यांची गुपित भागीदारी असल्याची एरंडोल शहरात चर्चा आहे. तसेच नवाळे यांचेकडून सदर कामाचे कार्यारंभ आदेश सदर इसमाच्याच नावाने देण्याचे देखील नवाळे यांनी आश्वासन दिल्याचे कळते. सदर बाब गंभीर असून मुख्याधिकारी यांची उपरोक्त कृती हि लोकसेवक या नात्याने फौजदारी न्यास भंग, भारतीय दंड संहितेच्या कलम ४०९ अन्वये दखलपात्र गुन्हा आहे. सदर बाबीची गंभीर दखल घेऊन आपल्या स्तरावर विभागीय चौकशीचे आदेश द्यावेत तसेच विकास रमेश नवाळे यांचेवर गुन्हा नोंदवून कारवाई करण्यात यावी अशी मागणी जिल्हाधिकारी आयुष प्रसाद यांचेकडे करण्यात आली आहे.
