पाचोरा (शहर प्रतिनीधी ) – संपुर्ण महाराष्ट्रात सद्यस्थितीत मराठा समाजाला आरक्षण मिळाव म्हणुन सुरू असलेल्या आंदोलनास पाचोरा – भडगाव मतदार संघातील राष्ट्रवादी काॅंग्रेस पक्षाचे पदाधिकारी आणि कार्यकर्त्यांचा जाहिर पाठींबा असुन उपमुख्यमंत्री ना. अजित पवार यांना मराठा समाजाला आरक्षण मिळण्यासाठी आम्ही निवेदन दिले आहे.
येणार्‍या काळात मराठा समाजाच्या सर्वच आंदोलनात राष्ट्रवादी काँग्रेस पक्ष सक्रिय सहभागी राहिल अशी माहिती मा. आ. दिलीप वाघ यांनी त्यांच्या निवासस्थानी आयोजित पत्रकार परिषदेत दिली. या प्रसंगी नगरपालिकेचे मा. गटनेते संजय वाघ, खलिल देशमुख, नितिन तावडे, रणजित पाटील, अजहर खान, पी. डी. भोसले, भडगाव तालुका अध्यक्ष राहुल पाटील यांचेसह पाचोरा व भडगाव तालुक्यातील पदाधिकारी उपस्थित होते. यावेळी बोलतांना दिलीप वाघ म्हणाले की, मराठा समाजाला आरक्षण मिळावे ही सर्वच पक्षांची मागणी असुन आरक्षण मिळण्यास कायदेशीर अडचणी येत असल्याने तिढा कायम आहे. या आरक्षणासाठी वेळोवेळी बैठका सुरू असुन नुकतीच त्रिसदसीय समीतीची नियूक्ती करण्यात आली आहे.
मनोज जरांगे पाटील यांनी आरक्षणासाठी सुरू ठेवलेल्या उपोषणास आमचा पाठींबा असुन आजवर मराठा समाजच्या आरक्षणासाठी झालेल्या सर्वच आंदोलनामध्ये आम्ही व आमच्या पदाधिकारी कार्यकर्त्यांनी सहभागी होवुन पाठींबा दिला आहे. सरकारने ओबीसी आरक्षणाला धक्का न लावता मराठा समाजाला आरक्षण अशी मागणी शासन दरबारी आम्ही करणार आहोत. सोबतच कोळी आणि धनगर समाजाच्या आरक्षण मागणीही पुर्ण करावी अशी माहीती दिलीप वाघ यांनी दिली. तसेच मराठा समाजाला आरक्षण मिळे पर्यंत पाचोरा मतदार संघातील विविध कार्यक्रम रद्द करण्यात येत असुन राष्ट्रवादी काँग्रेसचे पदाधिकारी व कार्यकर्ते हे त्यांचे वाढदिवस साजरे करणार नाहीत असेही मा. आ. दिलीप वाघ यांनी सांगितले.
