धरणगाव (प्रतिनिधी) – पाळधी येथे गोमांसची वाहतूक करत असल्याच्या संशयातून संतप्त जमावाने ट्रक पेटवून दिल्याची घटना पाळधी बायपास गोडाऊन जवळ काल गुरुवारी रात्री ११ वाजेच्या सुमारास घडली. या घटनेमुळे पाळधी गावासह परिसरात रात्री उशिरापर्यंत तणावाचे वातावरण निर्माण झाले होते.
बांभोरी एसएसबीटी कॉलेजजवळ पेट्रोल पंपावर डिझेल भरण्यासाठी गुरुवारी रात्री ९ वाजता एक ट्रक थांबला होता. त्यातून दुर्गंधी येत असल्याने काही तरुणांना संशय आला. त्यांनी ट्रकचालकाची विचारपूस सुरू केल्यावर त्याने उडवाउडवीची उत्तरे दिली. त्यामुळे तरुणांसह पेट्रोल पंपावरील कर्मचाऱ्यांनी पाळधी दूरक्षेत्रला फोन करुन माहिती दिली. काही वेळातच काही पोलिस कर्मचारी पेट्रोल पंपावर दाखल झाले. त्यानंतर हा ट्रक पाळधी दूरक्षेत्राला जमा न करता बायपासच्या दिशेने पुढे जात असल्याने पोलिस कर्मचारी ट्रक सोडून देत असल्याचा संशय पाठीमागून येणाऱ्या तरुणांचा झाला. त्यामुळे त्यांनी ट्रक अडवला आणि ट्रकचालकास मारहाण करीत ट्रक पेटवून दिला.
यावेळी पोलिस व संतप्त तरुणांत प्रचंड वाद झाला. पोलिस लाठीचार्ज करीत असताना तरुणांनी देखील त्यांच्यावर दगडफेक केली. यात काही पोलिस कर्मचारी जखमी झाल्याचे कळते. या प्रकारामुळे महामार्गावर वाहतुकीची कोंडी तसेच परिसरात तणाव निर्माण झाला होता. दरम्यान, पोलिसांनी तरुणांची गर्दी पांगवण्यासाठी लाठीहल्ला केला. तरी देखील तरुणांनी घटनास्थळ न सोडता ट्रक पेटवला. घटनेची माहिती मिळताच पोलिस अधीक्षक एम. राजकुमार घटनास्थळी पोहोचले होते. तसेच परिस्थितीवर नियंत्रण मिळवण्यासाठी दंगा नियंत्रण पथकाच्या दोन तुकड्या पाळधीत दाखल झाल्या. रात्री उशिरापर्यंत गुन्हा दाखल करण्याचे काम सुरू होते.
