भुसावळ शहरातील संभाजी नगरातील घटना
भुसावळ (प्रतिनिधी) – शहरातील संभाजी नगरातील एजीसी इंग्लिश मिडीअम स्कूलमध्ये लहान मुलांचे भांडणावरून पालकांनी गावगुंड आणून शाळेचे कर्मचारी व महिला शिक्षिकांना मारहाण करून विनयभंग केल्याची धक्कादायक घटना शनिवारी ५ ऑगस्ट रोजी सकाळी ११ वाजता घडली. याप्रकरणी भुसावळ बाजारपेठ पोलीस ठाण्यात गुन्हा दाखल करण्यात आला आहे.
संभाजी नगरातील एजीसी इंग्लिश मिडीअम स्कूल आहे. शाळेतील काही लहान मुलींमध्ये वाद झाल्याने शाळेतील शिक्षिकांनी मुलांच्या पालकांना समजविण्यासाठी शनिवारी ५ ऑगस्ट रोजी सकाळी ११ वाजता शाळेत बोलावण्यात आले होते. यावेळी शाळेतील कर्मचारी आणि शिक्षिका हे पालकांना समजवित असतांना वाद झाला. त्यात किशोर सुर्यवंशी, राजू सुर्यवंशी, आनंद सुर्यवंशी, छोटू सुर्यवंशी, रोहन सुर्यवंशी यांच्यासह इतर २ ते ३ जणांनी शाळेतील कर्मचारी शेख अय्युब शेख युनूस आणि महिला शिक्षिकांना चापटाबुक्क्यांनी बेदम मारहाण केली. त्यानंतर एका शिक्षिकेचा हात पकडून विनयभंग केला.
हा प्रकार घडल्यानंतर भुसावळ बाजार पेठ पोलीस ठाण्यात तक्रार दाखल करण्यात आली. याप्रकरणी दुपारी ३ वाजता शिक्षकाने दिलेल्या फिर्यादीवरून किशोर सुर्यवंशी, राजू सुर्यवंशी, आनंद सुर्यवंशी, छोटू सुर्यवंशी, रोहन सुर्यवंशी रा. वरणगाव ता.भुसावळ यांच्यासह इतर दोन ते तीन जणांविरोधात भुसावळ बाजार पेठ पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक राजू सांगळे करीत आहे.
