फैजपूर येथील प्रकार, प्रकृती स्थिर
यावल (प्रतिनिधी) : तालुक्यातील फैजपूर येथील पोलीस स्टेशनमध्ये एका संशयित आरोपीवर बलात्काराचा गुन्हा दाखल झाला. गुन्हा दाखल झाल्यानंतर त्याला अटक करण्यात आली. पोलीस कोठडीत गेल्यावर मात्र त्याने आत्महत्या करण्याचा प्रयत्न केला. या प्रकरणी गुन्हा दाखल करण्यात आला असून संशयित आरोपीची प्रकृती आता स्थिर आहे.
रामचंद्र संघरत्न वाघोदे (वय ३३, रा. वडगाव ता. रावेर) असे संशयित आरोपीचे नाव आहे. यावल तालुक्यातील बामणोद येथील ३२ वर्षीय महिलेशी त्याने प्रेम संबंध प्रस्थापित केले होते. त्यानंतर मी तुझ्याशी लग्न करणार असे वारंवार आश्वासन देऊन त्याने २०१७ पासून तर आजपर्यंत बामणोद, वडगाव, गारबर्डी धरण व भुसावळ येथील दोन लॉज येथे नेऊन त्याने वेळोवेळी तिच्यावर बलात्कार केला. दरम्यान, फिर्यादी ही तीन वेळा गर्भवती राहिली. मात्र वेळोवेळी तिला आयुर्वेदिक गोळ्या देऊन तिचा गर्भपात केला.
या कारणावरून ३२ वर्षीय महिलेने दिलेल्या फिर्यादीवरून फैजपूर पोलीस स्टेशनला १ जुलै रोजी पहाटे पावणे २ वाजेच्या सुमारास गुन्हा दाखल करण्यात आला.
गुन्हा दाखल झाल्यानंतर पोलिसांनी संशयित रामचंद्र संघरत्न वाघोदे याला त्याच दिवशी १ जुलै रोजी अटक केली होती. पोलीस कोठडीत असताना संशयित आरोपीने दुपारी ३ वाजेच्या सुमारास ब्लेडने डाव्या हातावर मारून घेत आत्महत्येचा प्रयत्न केला. पोलिसांनी तात्काळ त्याला रावेर ग्रामीण रुग्णालय आणि त्यानंतर जळगाव सिव्हिल हॉस्पिटल येथे उपचारार्थ दाखल केले होते. आता त्याची प्रकृती स्थिर असल्याचे स. पोलिस निरीक्षक निलेश वाघ यांनी सांगितले आहे.
दरम्यान बलात्काराच्या गुन्ह्यामध्ये पोलीस उपनिरीक्षक एम. जे. शेख तपास करीत आहेत. तर कोठडीत आत्महत्येचा प्रयत्न केला या प्रकरणी फैजपूर पोलीस स्टेशनला गुन्हा दाखल करण्यात आला असून पोलीस उपनिरीक्षक मोहन लोखंडे तपास करीत आहेत.
