जळगाव (प्रतिनिधी) – शहरातील प्रसिद्ध पोलन पेठेतील मुख्य रस्त्यावर मराठा मटण हॉटेलजवळ एका चहाच्या दुकानदाराला मागून धडक देत जबर जखमी करून गंभीर केले आहे. याप्रकरणी दुचाकीचालकाविरुद्ध शहर पोलीस स्टेशनला गुन्हा दाखल करण्यात आला आहे.
विशाल कैलास राजपूत (वय ३५, रा. बालाजी पेठ, जळगाव) हा पोलन पेठेत चहाविक्रीचा व्यवसाय करून उदरनिर्वाह करतो. दि. १० जून रोजी संध्याकाळी ५. ३० वाजता गजबजलेल्या वेळी तो चहा बनवत असताना अचानकपणे एक दुचाकीस्वार क्र. (एमएच १९ डीएफ ३७८७) ने जोरात आला. अन विशाल राजपूत यास मागून जोरदार धडक देऊन गंभीर जखमी केले. यावेळी आजूबाजूच्या नागरिकांनी त्याला खाजगी रुग्णालयात दाखल केले. तर धडक देणाऱ्या दुचाकीस्वार तरुणाला जमाव चोप देण्याच्या प्रयत्नात असताना तो पळून गेला आहे.
दरम्यान ९ दिवसांनी शुद्धीवर येऊन प्रकृती स्थिर झाल्यानंतर त्याने शहर पोलीस स्टेशनच्या कर्मचाऱ्यांना जबाब दिला आहे. त्याच्या फिर्यादीवरून शहर पोलीस स्टेशनला गुन्हा दाखल करण्यात आला आहे. पुढील तपास पोहेकॉ रवींद्र सोनार करीत आहेत. दरम्यान, सदर दुचाकी पाचोरा येथील असून त्या व्यक्तीचा मुलगा अहमदाबाद येथे राहतो. तर घटनेतील दुचाकी जळगावात नेमकी कुणाला दिली होती, याचा तपास पोलीस करीत आहेत.
