सायबर पोलिसांची दमदार कामगिरी
जळगाव (प्रतिनिधी) – रावेर शहरातील व्यापारी मोहनलाल पटेल यांनी सायबर पोलीस स्टेशनला तक्रार दिली होती. बांधकामास लागणारे स्टिल मटेरियल पाठवितो, असे सांगत त्यांची १६ लाखांत ऑनलाईन फसवणूक करण्यात आली होती. या प्रकरणात आतापर्यंत पोलिसांनी दोन संशयितांना अटक केली होती. मात्र सखोल तपास केल्यावर आणखी दोन मुख्य सूत्रधारांना अटक करण्यात आली आहे.
मोहनलाल देवजी पटेल (वय ६०, रा. गजानन नगर, रावेर) यांनी याबाबत जानेवारी महिन्यात फिर्याद दिली होती. मोहनलाल देवजी पटेल यांना संशयित ललितकुमार तुलसीराम खंडेलवाल (वय ३८, रा. छिपावली, ता. जि. सिरोही, राजस्थान) याने फोनवरून ‘आमची आयएसओ टॉप्स इंडिया मेटल ट्रेडर्स’ नावाची कंपनी आहे. आम्ही तुम्हाला बांधकामासाठी लागणारे स्टिल मटेरियल पाठवितो, असे सांगून विश्वास संपादन केला. १९ ते २१ नोव्हेंबर दरम्यान हा गुन्हा घडला होता. तसेच त्यांना टॅक्स इन्व्हॉईस व बनावट ई बिल पाठवून त्यांच्याकडून वेळोवेळी १६ लाख २७ हजार ८०० रुपये घेऊन त्यांची ऑनलाईन फसवणूक केली. याप्रकरणी गुन्हा दाखल झाल्यानंतर १५ मार्चला संशयित ललितकुमार खंडेलवाल याला सायबर पोलिसांनी सुरतमधून अटक केली.
सदर प्रकरणात दुसरा संशयित आरोपी मोहम्मद आफताब असगर अली (४३, साकीनाका, मुंबई) हा निष्पन्न झाला होता. सायबर पोलीस स्टेशनच्या कर्मचाऱ्यांनी रविवारी ८ मे रोजी रात्री ८ वाजेच्या सुमारास त्याला मुंबई येथून अटक केली आहे. या दोघांची सखोल चौकशी केल्यानंतर तसेच तपासात पुढे प्रगती केल्यानंतर सायबर पोलीस स्टेशनच्या कर्मचाऱ्यांनी अजून दोन प्रमुख सूत्रधार निष्पन्न केले. त्यांना शिताफीने व तांत्रिक विश्लेषणाच्या आधारावर मुंबई भागातील वसई-विरार येथून रविवारी १८ जून रोजी ताब्यात घेऊन अटक करण्यात आली आहे.
महेंद्र गणेश पालीवाल (वय २३, रा. पांजरपोळ, रतन पोल, अहमदाबाद, गुजरात) आणि धर्मेंन्द्र अरविंद राठोड (वय ३९, यशवंत नगर, नालासोपारा (पश्चिम), जि. पालघर) असे रविवारी ताब्यात घेतलेल्या आरोपींची नावे आहेत. पोलीस निरीक्षक अशोक उतेकर, पोलीस कर्मचारी श्रीकांत चव्हाण, वसंत बेलदार, ललित नारखेडे, पंकज वराडे आदींनी सहभाग घेतला. बांधकामास लागणारे स्टील मटेरीअल पाठवितो असे सांगुन बनावट कंपनीची बनावट वेबसाईट तयार करुन त्याद्वारे स्वतःची कंपनी आहे असे सांगुन बनावट कागदपत्र पाठवुन मटेरीअल ट्रकने पाठवितो असे सांगुन त्याद्वारे लोकांचा विश्वास संपादन करुन रक्कम भरण्यात लावणे व त्यानंतर कुठलेही मटेरीअल न पाठविणे अशी आरोपींची काम करण्याची पद्धत असल्याची माहिती पोलिसांनी दिली.
