चोपडा (प्रतिनिधी) – चोपडा शहरामध्ये मुस्लिम कब्रस्तानजवळ जळगाव येथील एका व्यक्तीला संशयित चार जणांनी चाकूने आणि लोखंडी रॉडने मारहाण केली. तसेच ८०० रुपये हिसकावून पळ काढला. याप्रकरणी चोपडा शहर पोलीस स्टेशनला गुन्हा दाखल करण्यात आला आहे.
नूर मोहम्मद पिंजारी (वय २३, रा. साकेगाव ता. भुसावळ. ह. मु. सुभाष चौक, बोहरा मशीदीजवळ, जळगाव) असे जखमी तरुणाचे नाव आहे. सध्या तो शिक्षण करत आहे. काही कामानिमित्ताने तो चोपडा येथे रविवारी २८ रोजी गेला होता. संध्याकाळी ७ वाजेच्या सुमारास अज्ञात चार तरुणांनी काही कारण नसताना मारहाण करून शिवीगाळ केली. एकने खिशातील चाकू काढून त्याच्या उजव्या हाताला वार केला तर दुसऱ्याने लोखंडी रॉड डोक्यात टाकला.
तसेच खिशातील ८०० रुपये जबरीने काढून घेतले. याप्रकरणी चोपडा शहर पोलीस स्टेशनला नूर पिंजारी यांच्या फिर्यादीवरून रात्री पावणेदहा वाजता गुन्हा दाखल करण्यात आला आहे. त्यानुसार सत्यम चैत्राम पाटील व बंटी उर्फ जयेश शांताराम कोळी दोन्ही रा. चोपडा व अन्य दोघांविरुद्ध गुन्हा दाखल आहे. तपास पोलीस उपनिरीक्षक घनश्याम तांबे हे करीत आहेत.
