चोपडा तालुक्यातील घटना
चोपडा (प्रतिनिधी) : पावसाळा महिन्याभरावर आला असून त्यापूर्वी शेतकरी बी-बियाणे खरेदी करून ठेवतात. मात्र काही ठिकाणी बनावट बियाणे विक्री करून शेतकऱ्यांची फसवणूक केली जात आहे. अशातच चोपड्यात बनावट कापूस बियाण्याची ९५ पाकीटे जप्त करून गुन्हा दाखल करण्यात आला आहे.
जिल्हा गुणवत्ता नियंत्रण निरीक्षक जळगाव अरुण तायडे यांना दि. २४ मे रोजी पहाटे गुप्त माहितीच्या आधारे चोपडा शहराच्या बाहेरील अग्रवाल पेट्रोल पंपाच्या बाजूला हॉटेल न्यू सुनिता मध्ये बनावट स्वदेशी-५ या नावाच्या वाणाची कापूस बियाणे साठा ठेवला आहे अशी गुप्त खबर मिळाली.
त्यानुसार अरुण तायडे यांनी चोपडा पोलिसांच्या मदतीने हॉटेल न्यू सुनितामध्ये जाऊन चौकशी केली. तेथे संशयित संदीप आधार पाटील रा.वर्डी ता. चोपडा याने वाहन खराब झाल्याने दोन प्लास्टिकच्या पिशव्या भरून कापूस बियाणे हॉटेलमध्ये ठेवले होते असे हॉटेल मॅनेजर अमोल राजपूत यांनी सांगितले.
त्यावरून तायडे यांनी चोपडा पोलीस स्टेशन येथे बियाणे कायदा १९६६, महाराष्ट्र कापूस बियाणे नियंत्रण कायदा २००९, बियाणे नियंत्रण आदेश १९८३ अन्वये शासनाची व शेतकऱ्यांची फसवणूक केल्याप्रकरणी संदीप आधार पाटील या.वर्डी रा.चोपडा यांच्या विरोधात गुन्हा दाखल करून बनावट स्वदेशी-५ या कापूस बियाण्याची सुमारे १ लाख रुपये किमतीची ९५ पाकिटे जप्त करून गुन्हा दाखल केला आहे.
