भडगाव ( प्रतिनिधी ) – गोदावरी फाऊंडेशनतर्फे वडजी ता. भडगाव येथे शनिवार दि.१३ मे रोजी मारुतीच्या पाराजवळ मोफत आरोग्य तपासणी शिबिराचे आयोजन करण्यात आले आहे. शिबिरात मोफत हृदयाची सोनोग्राफी अर्थात टू डी इको तपासणी तसेच ईसीजी कार्डिओग्राफ, मधुमेह, रक्‍तदाब तपासणी करण्यात येणार आहे.
स्वराज्य रक्षक संभाजी राजे जन्मोत्सव सोहळ्यानिमित्‍त (वडजी-गुढे गट) तसेच युवक काँग्रेस तालुका अध्यक्ष प्रदिप भिकनराव पाटील, काँग्रेस कमिटी भडगाव यांच्या संयुक्‍त विद्यमाने व गोदावरी फाऊंडेशन संचलित डॉ.उल्हास पाटील वैद्यकीय महाविद्यालय व धर्मदाय रुग्णालयातर्फे शनिवार दि.१३ मे रोजी सकाळी १० ते ३ या वेळेत महाआरोग्य शिबिराचे आयोजन केले आहे. याप्रसंगी प्रमुख अतिथी म्हणून गोदावरी फाऊंडेशनचे अध्यक्ष तथा माजी खासदार डॉ.उल्हास पाटील, आमदार शिरीष चौधरी, काँग्रेस कमिटी जिल्हाध्यक्ष बाळासाहेब प्रदिपराव पवार, वैशाली सुर्यंवशी यांची विशेष उपस्थीती राहणार आहे.
शिबिरात कान-नाक-घसा, नेत्रविकार, अस्थिविकार, हृदयविकार, दारुमुळे होणारे पोटाचे आजार, मानसिक आजार, त्वचाविकार, स्त्रीयांना असलेल्या मासिक पाळी, गर्भपिशवीची समस्या अशा विविध आजारांची शिबिरात तज्ञांद्वारे तपासणी केली जाईल. अधिक माहितीसाठी अतुल पाटील, हारुन पटेल, प्रकाश सोनवणे यांच्याशी संपर्क साधावा. या मोफत आरोग्य तपासणी शिबिराचा लाभ घ्यावा असे आवाहन आयोजकांनी केले आहे.
