जळगाव (प्रतिनिधी) – मेहरूण परिसरातील गायत्री नगरात दुस-या मजल्यावरून पडून नशिराबाद येथील मजुराचा मृत्यू झाल्याची घटना शनिवारी सकाळी ११ वाजेच्या सुमारास घडली आहे. मृतदेह सरकारी रुग्णालयात आल्यावर त्यांच्या मुलाने फोडलेला हंबरडा पाहून लोकांचे मन हेलावले होते. एमआयडीसी पोलिसात अकस्मात मृत्यूची नोंद करण्यात आली आहे.
कैलास बाबुराव महाजन (४२, रा.नशिराबाद) असे मयत मजुरांचे नाव आहे. कैलास महाजन हे नशिराबाद येथे आई व नववीतील मुलासह वास्तव्यास होते. माळीकाम करणारे ठेकेदार प्रकाश मराठे यांच्याकडे ते कामाला होते. मराठे यांनी गायत्री नगरातील एका बंगल्यातील काम घेतले होते. त्यामुळे कैलास हे शनिवारी सकाळी माळीकामाला आले होते. मात्र, सकाळी ११ वाजेच्या सुमारास अचानक बंगल्याच्या दुस-या मजल्यावरून पाय घसरून ते पडले.
त्यांच्या हाता-पायाला तसेच डोक्याला जबर दुखापत होवून ते गंभीर जखमी झाले. इतर मजुरांना ही घटना दिसल्यानंतर त्यांनी तत्काळ त्यांना वाहनातून जिल्हा रूग्णालयात उपचारार्थ नेले. मात्र, वैद्यकीय अधिकारी डॉ. झिशान खान यांनी तपासणीअंती महाजन यांना मृत घोषित केले. यावेळी मराठे यांच्यासह महाजन यांच्या नातेवाईकांची रूग्णालयात मोठ्या प्रमाणात गर्दी झाली होती. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली असून पोलीस तपास करीत आहेत.
