जळगाव ( प्रतिनिधी ) – जळगाव शहरातील खोटे नगरजवळील वाटीका आश्रम परिसरातील बंद घर फोडून सोन्याचे दागिने व रोकड असा एकुण ४० हजारांचा मुद्देमाल अज्ञात चोरट्यांनी चोरून नेला आहे. याबाबत सोमवारी जळगाव तालुका पोलीस स्टेशनला अज्ञात चोरट्यांविरोधात गुन्हा दाखल करण्यात आला आहे.
याबाबत पोलीस सुत्रांकडून मिळालेली माहिती अशी की, गोविंद सुकदेव पाटील (वय-५६) रा. गुरूकृपा सोसायटी, वाटीका आश्रम जवळ, खोटे नगर जळगाव हे आपल्या परिवारासह राहायला आहे. ९ मार्च रोजी त्यांनी राहते घर बंद करून बाहेरगावी गेले होते. घर बंद असल्याचे पाहून अज्ञात चोरट्यांनी बंद घराचे कुलूप तोडून आत प्रवेश करत घरातील कपाटातून सोन्याचे दागिने आणि रोकड असा एकुण ४० हजारांचा मुद्देमाल चोरून नेल्याचे रविवारी १२ मार्च रोजी सकाळी ८ वाजता उघडकीला आला. गोविंद पाटील हे घरी आल्यानंतर त्यांनी घरातील सामान अस्तव्यस्त पडून असल्याचे दिसून आले. याबाबत जळगाव तालुका पोलीसांनी माहिती देण्यात आली. पोलीसांनी घटनास्थळी जाऊन पंचनामा केला. सोमवारी १३ मार्च रोजी दुपारी गोविंद पाटील यांनी दिलेल्या फिर्यादीवरून जळगाव तालुका पोलीस स्टेशनला अज्ञात चोरट्यांविरोधात गुन्हा दाखल करण्यात आला आहे. पुढील तपास पोहेकॉ अनिल मोरे करीत आहे.
