म्हसावद येथील पद्मालय शिक्षण प्रसारक मंडळ प्रकरण
जळगाव (प्रतिनिधी) तालुक्यातील म्हसावद येथील पद्मालय
शिक्षण प्रसारक मंडळ संस्था हडप केल्याच्या प्रकरणांमध्ये सात वर्षांपूर्वी दाखल झालेल्या गुन्ह्याचा खटला न्यायालयात सुरू होता. आज शुक्रवार १७ फेब्रुवारीला खटल्याचा निकाल लागून न्यायालयाने पालकमंत्री गुलाबराव पाटील, त्यांचे पुत्र प्रतापराव पाटील यांच्यासह सहा जणांची निर्दोष मुक्तता केली आहे.
म्हसावद येथिल पद्मालय शिक्षण प्रसारक मंडळ संस्था ही २८ सप्टेंबर १९९१ ला स्थापन झाली. संस्थेला अडचणी आल्यामुळे संस्थेतील काही सभासदांनी तत्कालीन आमदार गुलाबराव पाटील यांची भेट घेऊन संस्था २००८ साली त्यांच्या ताब्यात दिली होती. त्यानंतर काही मंडळींना सचिव पदावरून हटवण्यात आले. या व्यक्तींनी संस्था हडप केल्याचा गुलाबराव पाटील यांच्यावर आरोप केला. त्या अनुषंगाने पोलीस स्टेशनला गुन्हा देखील दाखल केला. या गुन्ह्यामध्ये गुलाबराव पाटील यांना अटक देखील झाली होती.
त्यानंतर या खटल्याचे कामकाज न्यायालयात सुरू होते. न्यायाधीशांनी सर्व बाजूने युक्तिवाद ऐकल्यानंतर व परिस्थिती जाणून घेतल्यावर आज शुक्रवारी निकाल दिला. ह्या निकालात पालकमंत्री गुलाबराव रघुनाथ पाटील, यांच्यासह त्यांचे पुत्र प्रतापराव गुलाबराव पाटील, बंधू सुनील रघुनाथ पाटील, रामसिंग अमृत पाटील, सुगनचंद फकीरचंद पाटील, डॉ. कैलास लक्ष्मण पाटील यांची निर्दोष मुक्तता केली आहे.
या खटल्यामध्ये एकूण दहा साक्षीदार तपासण्यात आले. अभियोग पक्षाने सदरच्या गुन्ह्यातील केलेले आरोप शंकेच्या पलीकडे शाबित न करू शकल्यामुळे सदरच्या गुन्ह्यातून न्यायालयाने सर्व आरोपींची निर्दोष मुक्तता केली. खटल्यामध्ये संशयित आरोपींतर्फे अँड. प्रदीप देशमुख व ॲडव्होकेट रवींद्रसिंग पाटील यांनी तर फिर्यादीतर्फे अँड. गोपाळ जळमकर यांनी कामकाज पाहिले.
