जळगाव ( प्रतिनिधी ) – शहरातील सेंट जोसेफ शाळेजवळ गाडी लावण्याच्या कारणावरून एका १६ वर्षीय अल्पवयीन मुलाला ३ ते ४ जणांनी धारदार चाकूने वार करून गंभीर जखमी केल्याची घटना सोमवारी १३ फेब्रुवारी रोजी सायंकाळी ६ वाजता घडली. याबाबत रामानंदनगर पोलीस स्टेशनला अज्ञातांवर गुन्हा दाखल करण्यात आला आहे.
याबाबत रामानंदनगर पोलीसांनी दिलेली माहिती वरून, आर्यन अजय पाटील (वय-१६) रा. दांडेकर नगर, जळगाव हा विद्यार्थी आईवडील व बहिणीसोबत राहायला आहे. शहरातील काशिनाथ पलोड या शाळेत इयत्ता दहावीच्या वर्गात शिकत आहे. सोमवारी १३ फेब्रुवारी रोजी सायंकाळी ६ वाजता आर्यन हा दुचाकीने खासगी क्लाससाठी मित्र सोहम इखनकर याला घेण्यासाठी सेंट जोसेफ शाळेजवळील मिनाताई ठाकरे कॉम्प्लेक्स येथे आला. त्याठिकाणी आगोदरच तीन ते चार जण उभे होती. त्यावेळी अनोळखी तरूणांनी इथे दुचाकी लावू नको असे सांगून आर्यनला चापटाबुक्क्यांनी बेदम मारहाण केली. तर एकाने पाठीत चाकूने वार केला व सर्वजण घटनास्थळाहून पसार झाले. जखमी अवस्थेत आर्यनच्या मित्रांनी त्यांला तातडीने जिल्हा शासकीय वैद्यकीय महाविद्यालयात दाखल करण्यात आले. या प्रकरणी आर्यनने दिलेल्या फिर्यादीवरून रामानंदनगर पोलीस स्टेशनला रात्री ११ वाजता अज्ञात ३ ते ४ जणांविरोधात गुन्हा दाखल करण्यात आला आहे. पुढील तपास पोहेकॉ सुनिल पाटील करीत आहे.
