जळगाव (प्रतिनिधी ) –येथील निवृत्ती नगरात राहणाऱ्या तीस वर्षीय तरुणाचा मध्यरात्री १ वाजेच्या सुमारास दोन तरुणांनी चॉपरने भोसकून निर्घृण खून करण्यात आल्याची दुर्दैवी घटना घडली आहे. पोलिसांनी दोन मारेकऱ्यांना निष्पन्न केले असून पोलिसांचे पथक संशयित आरोपींच्या मागावर झाले आहेत.
भावेश उत्तम पाटील ( वय ३०, रा.निवृत्ती नगर) असे मयत इसमाचे नाव आहे. ते वाळू व्यावसायिक आहेत. या युवकाची हत्या हि वाळू व्यवसाय आणि पुर्ववैमनस्यातून झाली असल्याची माहिती समोर आली आहे.
मंगळवारी २३ ऑगस्ट रोजी भावेश त्यांच्या काही मित्रांसह मध्यप्रदेशातील सेंधवा येथे ट्रॅक्टर ट्रॉली सोडविण्याच्या कामासाठी गेले होते. संध्याकाळी ७ वाजता तो आव्हाणे येथे परतला.
घरी परतत असताना कानळदा रस्त्यावरील हॉटेल लक्ष्मी येथे संशयित आरोपी मनीष नरेंद्र पाटील (वय २२, आव्हाणे) व भूषण रघुनाथ सपकाळे (वय ३२, रा. खेडी खुर्द ता. जळगाव) यांच्याशीभावेश याचा वाद झाला. त्यानंतर तो घरी दुचाकीने जळगावात निवृत्ती नगर येथे आला. काही वेळाने रात्री १२ वाजेच्या सुमारास संशयित दोघे भावेश याच्या घरी येऊन गोंधळ घालायला लागले.
यावेळी भावेश हा घरापासून काही अंतरावर बाहेर गेला. संशयितांशी बोलत असताना संशयित मनीष व भूषण यांनी त्याच्यावर चॉपरने हल्ला करून त्याला जागीच ठार केले. या घटनेमुळे परिसरात एकच धावपळ उडाली. पोलिसांनी घटनास्थळी येऊन पाहणी केली.
यावेळी अप्पर पोलीस अधीक्षक चंद्रकांत गवळी, सहायक पोलीस अधीक्षक कुमार चिंता, जिल्हापेठ पोलीस निरीक्षक अरुण धनवडे यांच्यासह पोलिसांनी तत्काळ परिस्थिती हाताळत संशयितांची नावे निष्पन्न केली. त्यानंतर त्यांच्या मागावर पथक रवाना केले आहेत. मयत भावेश याच्या पश्चात वडील, पत्नी, मुली, भाऊ असा परिवार आहे.
दरम्यान, मयत भावेश पाटील याचा मृतदेह शासकीय वैद्यकीय महाविद्यालय व रुग्णालय येथे नेण्यात आला. रुग्णालयात नातेवाईकांनी एकच आक्रोश केला. दरम्यान गेल्या ५ महिन्यात खुनाची हि १३ वि घटना आहे. तर गेल्या तीन दिवसातील जिल्ह्यातील हि तिसरी घटना आहे. सतत होणाऱ्या खुनांमुळे जळगावकरांमध्ये भीतीचे वातावरण निर्माण झाले असून पोलिसांच्या भूमिकेवर प्रश्नचिन्ह निर्माण झाले आहे.खून होणाऱ्य व्यक्तींमध्ये तरुण व्यक्तींचे प्रमाण असल्याने चिंता वाढली आहे.यानुसार मनीष पाटील भूषण सपकाळे या दोघांच्या विरोधात जिल्हापेठ पोलीस स्टेशनला गुन्हा दाखल करण्यात आला असून घटनास्थळी अपर पोलीस अधिक्षक चंद्रकांत गवळी, सहायक पोलीस अधिक्षक कुमार चिंथा, पोलीस निरिक्षक अरूण धनवडे, सपोनि किशोर पवार आणि सहकार्‍यांनी घटनास्थळी भेट दिली. पुढील तपास पो.नि. धनवडे यांच्या मार्गदर्शनाखाली पीएसआय प्रदीप चांदेलकर ,पो.ना. जितेंद्र सुरवाडे करीत आहेत.
