मुंबई ( प्रतिनिधी ) – कर्मचारी भविष्य निर्वाह निधी खातेधारकांच्या किमान निवृत्तीत तिप्पट वाढीची शक्यता आहे. ईपीएफओच्या केंद्रीय विश्वस्त मंडळाची बैठक पुढील महिन्यात होणार आहे. या बैठकीत किमान पेन्शन नियमात तिप्पट वाढ करण्याबाबतची चर्चा होण्याची शक्यता आहे.
या बैठकीत सध्याची 1,000 रुपयांची किमान निवृत्ती 3,000 रुपये करण्याची शक्यता आहे. कामगार सचिवांच्या अध्यक्षतेखालील समिती लवकरच या बद्दल अहवाल सादर करणार आहे. या निर्णयाचा फायदा देशातील सुमारे 6.5 लाख निवृत्तीधारक आणि ईपीएफओच्या 5 कोटी ग्राहकांना होणार आहे. व्याजदरातील कपातीची नाराजी सरकार शेअर बाजारातील गुंतवणुकीतून भरुन काढण्याच्या विचारात आहे, ईपीएफओ मधील निधी शेअर बाजारात वळविण्याचा सरकारचा प्रयत्न आहे.
सीबीटी इक्विटीची मर्यादा 15 टक्क्यांवरून 25 टक्क्यांपर्यंत वाढवण्याबाबतही या बैठकीत चर्चा होणार आहे. पण कामगार संघटना इक्विटीमध्ये गुंतवणूक वाढवण्याच्या बाजूने नाहीत. शेअर बाजारातील अनिश्चिततेचे कारण पुढे करत संघटनांनी या निर्णयाला विरोध केला आहे. सरकारने व्याजदर घटवल्याच्या निर्णयाचा फटका देशभरातील 6.5 कोटी नोकरदारांना बसणार आहे. व्याजदरातील कपातीची नाराजी सरकार शेअर बाजारातील गुंतवणुकीतून भरुन काढण्याच्या विचारात आहे, ईपीएफओ मधील निधी शेअर बाजारात वळविण्याचा सरकारचा प्रयत्न आहे.
सध्या डेट फंडमध्ये हवा तसा परतावा मिळत नसल्याने, इक्विटीत गुंतवणूक वाढवून निर्धारीत उद्दिष्ठ गाठण्याचा प्रयत्न करण्यात येत आहे. या प्रस्तावावर विचारासाठी दोन आठवडयांपूर्वी आर्थिक गुंतवणूक आणि लेखाजोखा समितीची बैठक झाली होती. साधारणतः सरकार 30 जूनपर्यंत पीएफची रक्कम हस्तांतरीत करण्याची शक्यता आहे.
