यावल ( प्रतिनिधी ) – तालुक्यातील डोणगाव येथे पाणी भरण्याच्या वादातून एकावर विळ्याने हल्ला करण्यात आल्याची घटना घडली.
डोणगाव येथील अनिल चुडामण पाटील यांच्यावर विळ्याने हल्ला करण्यात आला असून त्यांनी यावल पोलीस स्थानकात फिर्याद दिली आहे. त्यांच्या घराजवळ असलेल्या सार्वजनिक नळाला पाणी आले. शेजारी धनराज पाटील हे विजेची मोटार लावून पाणी भरत होते. बराच वेळ झाला तरी ते पाणी भरत असल्याने त्यांनी धनराज पाटलांना विचारणा केली. त्याचा राग येऊन धनराज पाटील यांनी अनिल पाटील यास शिवीगाळ केली. भांडण सुरू असताना त्याचा मुलगा विशाल पाटील याने घरातून विळा आणून अनिल पाटील यांच्यावर हल्ला केला. यात त्यांच्या डाव्या हातावर तसेच डाव्या डोळ्याच्या खाली जखमा झाल्या. अनिल पाटील यांच्या फिर्यादीवरून धनराज शेनपडू पाटील, विशाल धनराज पाटील या दोघांविरुद्ध गुन्हा दाखल करण्यात आला आहे.
