जळगाव ( प्रतिनिधी ) – जिल्हा शासकीय वैद्यकीय महाविद्यालय व रूग्णालयात कैद्यांच्या दोन गटांमध्ये झालेल्या हाणामारीच्या चौकशीनंतर कर्तव्यात कसूर केल्याचा ठपका ठेवत चार पोलीसाना निलंबीत करण्यात आले आहे.
जळगाव जिल्हा रूग्णालयात रविवारी रात्री कैद्यांमध्ये हाणामारी झाली होती. जिल्हा रुग्णालयात दाखल कैदी सतीश गायकवाड व दशरथ महाजन या दोघांमध्ये कैदी वॉर्डात राडा झाल्यानंतर वॉर्ड क्र. ९ मधील डॉक्टरांनी गोपनीय अहवाल वैद्यकीय अधिष्ठातांना दिला. रुग्णालयात येणारे कैदी पोलिसांच्या उपस्थितीत दारू प्राशन करून धुमाकूळ घालतात , या कृत्यांमुळे जिल्हा रुग्णालयातील शेजारच्या वॉर्डात दहशत पसरली असून, रुग्णांनाा त्रास होतो आहे, असे नमूद केले होते.
या घटनेची पोलीस अधिकाऱ्यांनीही गंभीर दखल घेतली होती. पोलीस अधिक्षक डॉ. प्रवीण मुंढे यांनी स्वत: चौकशी केली त्यात पोलीस कर्मचार्यांचा हलगर्जीपणा दिसून आला. त्यांनी सीसीटिव्ही फुटेज तपासले असता अनेक गंभीर बाबी उघड झाल्या. चौकशीअंती डॉ. मुंढे यांनी पोलिस कर्मचार्यांच्या हलगर्जीपणावर ठपका ठेवत संदीप ठाकरे, पारस बाविस्कर, किरण कोळी, राजेश कोळी या चौघा पोलिसांना निलंबित केले आहे. पोलीस अधिकार्यांनी तसे आदेश जारी केले आहेत.
