यावल ( प्रतिनिधी ) – तालुक्यातील किनगाव येथील महावितरणच्या वीज उपकेंद्रांतर्गत गिरडगाव शिवारात वीजपुरवठा करणाऱ्या सिमेंटच्या खांबावरील वीज तारा चोरीला गेल्या आहे. किनगावचे सहाय्यक अभियंता पंकज कांबळे यांनी यावल पोलीस ठाण्यात तक्रार दाखल केली आहे.
गिरडगाव परिसरातील चुंचाळे रोडवरील नारायण बोरसे यांच्या शेताजवळील गिरडगाव ग्रुप क्र.०४ पासून बेबाबाई तडवी यांच्या शेतापर्यंत 21 सिमेंटच्या उभ्या पोलवरील विज तारा अज्ञात चोरट्यांनी कापून नेल्या आहेत. एक सिमेंट खांब आडवा पाडून त्याचेही नुकसान करण्यात आले आहे. ही माहिती गिरडगावचे पोलीस पाटील अशोक पाटील यांनी सहायक अभियंता पंकज कांबळे यांना दिली. सहाय्यक अभियंता पंकज कांबळे यांनी वरिष्ठ तंत्रज्ञ दीपक दळवी , गणेश धनगर , कैलास भोई व इतर कर्मचारी यांना सोबत घेऊन घटनास्थळी पाहणी केली.
चोरट्यांनी जवळपास २१ खांबावरील ७१ हजार रुपये किमतीची विज तार चोरून नेल्याचे निदर्शनास आले. घटनास्थळी चोरट्यांनी तारांचे एक फुटाचे तुकडे करून पाच पाच किलोचे बंडल तयार केलेले घटनास्थळी आढळून आले. वीज तारा तोडण्यासाठी वापरण्यात आलेले दोन कटरही घटनास्थळी आढळून आल्याची माहिती मिळाली . गेल्या वर्षीही चिंचोली शिवारातील उंटावद परिसरात अशाच प्रकारे वीज तारा चोरून नेल्या होत्या .
चिंचोलीसह आडगाव कासारखेडा किनगाव परिसरात तीन दिवसांपासून शिवारातील विहिरीवरील केबल वायर स्टार्टर , ऑटो व इतर साहित्याची चोरी झाल्याच्या घटना ताज्या असतानाच पुन्हा चक्क वीज मंडळाच्या ताराच चोरून नेल्याने परिसरात खळबळ उडाली आहे. पुढील तपास यावल पोलीस निरीक्षक सुधीर पाटील व पो.हे.का.अजीज शेख करीत आहेत.
