अमळनेर ( प्रतिनिधी ) – आजारावर उपचारासाठी सात दिवसांच्या शिबीराचे आमिष दाखवत पतंजली नावाच्या बनावट बेवसाईच्या माध्यमातून तरूणाची ३३ हजाराची ऑनलाईन फसवणूक झाली अमळनेर पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे.
सुमित अशोक पाटील (वय-४१ रा. अमळनेर) खासगी हॉस्पीटलमध्ये काम करतात. पतंजली योगपीठ हरीद्वार या ठिकाणी असलेल्या शिबीरात कसे जावे यासाठी त्यांनी गुगल सर्चमध्ये जावून माहिती घेतली. त्यांना मिळालेल्या एका नंबरवर कॉल केला असता त्यांना समोरील व्यक्तीने आमचा एजंट तुम्हाला थोड्या वेळाने कॉल करेल असे सांगितले. त्यानुसार त्यांना अनोळखी नंबरवरून कॉल आला. त्यांनी सांगितले की, सात दिवसांचा हा कोर्स आहे. हरीद्वार येथे तूम्हाला यावे लागेल, उपचारासाठी खर्च नसतो परंतू राहण्यासाठी २० हजार रूपये खर्च लागेल असे सांगितले. सुमित पाटील यांनी २० हजार रूपये ऑनलाईन पाटविले. नंतर समोरील व्यक्तीने पुन्हा पैश्यांची मागणी केली सुमित पाटील यांनी पुन्हा १३ हजार रूपये ऑनलाईन पाठविले.
दरम्यान सुमित यांनी अमळनेर शहरातील पतंजली शॉपमध्ये जावून चौकशी केली असता शिबीरात जाण्यासाठी अशी कोणत्याही प्रकारची पध्दत नसल्याचे सांगितले. त्यावरून आपली फसवणूक झाल्याचे त्यांच्या लक्षात आले. त्यांनी अमळनेर पोलीस ठाण्यात तक्रार दिली. त्यांच्या तक्रारीवरून अमळनेर पोलीस ठाण्यात अनोळखी आरोपीवर गुन्हा दाखल करण्यात आला आहेत . पुढील तपास सहाय्यक फौजदार विलास पाटील करीत आहेत .
