मुंबई ( प्रतिनिधी ) – सिंधुदुर्ग जिल्हा बँक संचालक मंडळाच्या निवडणूक प्रचारादरम्यान शिवसैनिक संतोष परब यांच्यावरील प्राणघातक हल्ल्यानंतर निवडणुकीची जोरदार चर्चा आहे. भाजपा आमदार नितेश राणे यांच्यावर आरोप झाले जिल्हा न्यायालयाने त्यांचा अटकपूर्व जामीन अर्ज फेटाळला या निवडणुकीत भाजपाच्या सिद्धिविनायक सहकार पॅनलने दहा जागा जिंकल्या आहेत. महाविकास आघाडीला धक्का बसला आहे.
सहकारी पणन संस्था शेती प्रक्रिया संस्था व ग्राहक सहकारी संस्था मतदारसंघामध्ये भाजपाचे माजी जिल्हाध्यक्ष अतुल काळसेकर विजयी झाले आहेत. त्यांनी महाविकास आघाडीच्या सुरेश दळवी यांचा पराभव केला सहकारी संस्था, नागरी पतपुरवठा संस्था, पगारदार नोकरांच्या संस्था मतदारसंघात भाजपाचे जिल्हाध्यक्ष राजन तेली पराभूत झाले असून महाविकास आघाडीचे सुशांत नाईक विजयी झाले आहेत. सुशांत नाईक हे आमदार वैभव नाईक यांचे भाऊ असल्याने भाजपाला धक्का बसला भाजपाच्या सिद्धिविनायक सहकार पॅनलला आठ तर महाविकास आघाडीच्या सहकार समृद्धी पॅनलला सात जागांवर विजय मिळाला आहे.
कणकवलीमधून सतीश सावंत आणि विठ्ठल देसाई या दोन्ही उमेदवारांना समान मतं मिळाली होती. समसमान मतं पडल्यानंतर चिट्ठी टाकून आलेल्या निकालात सतीश सावंत पराभूत झाले. सतीश सावंत हे जिल्हा बँकेचे विद्यमान अध्यक्ष होते. औद्योगिक संस्था मजूर संस्था जंगल कामगार संस्था मोटार वाहतूक संस्था मतदारसंघातून भाजपाचे गजानन गावडे विजयी झाले आहेत. त्यांनी महाविकास आघाडीच्या लक्ष्मण आंगणे यांचा पराभव केला .
विमुक्त जाती, भटक्या जमाती व विशेष मागास प्रवर्ग मतदार संघातून महाविकास आघाडीचे मेघनाथ धुरी विजयी झाले आहेत. धुरी यांनी भाजपाच्या गुलाबराव चव्हाण यांचा पराभव केला आहे. १४ विद्यमान संचालक निवडणूक रिंगणात होते. शिवसेना-राष्ट्रवादी, काँग्रेस या महाविकास आघाडीचे सहकार समृद्धी पॅनेल विरुद्ध भाजपाचे सिद्धिविनायक सहकार पॅनेल यांच्यात चुरशीची लढत झाली.
