स्थानिक गुन्हे अन्वेषण विभाग, एमआयडीसी पोलिसांची कारवाई
जळगाव (प्रतिनिधी) – जिल्हा पोलीस दलाने अनधिकृत बायोडिझेलचा साठा करणाऱ्या तिघांवर कारवाई करीत लाखो रुपयांचे बायो डिझेल ताब्यात घेतले आहे. स्थानिक गुन्हे अन्वेषण शाखा आणि एमआयडीसी पोलीस स्टेशनच्या संयुक्त विद्यमाने हि कारवाई पार पडली.
पोलीस अधीक्षक डॉ. प्रविण मुंढे, अपर पोलीस अधीक्षक चंद्रकांत गवळी यांनी स्थानिक गुन्हे शाखाचे पोलीस निरीक्षक किरणकुमार बकाले यांना जळगाव जिल्ह्यात अनाधिकृत बायोडिझेलचा साठा करून चोरटी विक्री करणाऱ्यावर कारवाई करा असे आदेश दिले होते. त्यावरून स्थानिक गुन्हे शाखेकडील पोउपनिरी अमोल देवढे, पोह सुनिल दामोदरे, पोह महेश महाजन, पोना विजय पाटील, पोना प्रमोद लाडवंजारी, पोना किरण धनगर, पोकॉ पंकज शिंदे, पोका हेमंत पाटील, चालक पोहेकॉ विजय चौधरी तसेच एमआयडीसी पो.स्टे. चे प्रभारी अधिकारी अमोल मोरे, पोउपनिरी दिपक जगदाळे, पोना मुदस्सर काझी, पोना योगेश बारी अश्यांना नेमण्यात आले होते.
एमआयडीसी भागात बोलोरो पिकअप क्रमांक (एमएच-१९-एस-५७१५) मधुन बायोडिझेलची चोरटी विक्री करीत असल्याची माहिती मिळाली. सदर बोलेरो पिकअपचा शोध घेतला असता सदरचे वाहन हे फातीमा नगर, श्रुषीराज इंडस्ट्रीज पीव्हीसी पाईप पॉलीमर सेक्टर नंबर ११९ बाजुला मोकळ्या मैदानात ट्रक क्रमांक एमएच १९ झेड-२५७७ यात अनाधिकृत पणे बायोडिझेलची चोरटी विक्री करीत असतांना ३ इसम मिळून आले. बोलेरो गाडीचे मालक दानिश शेख अन्वर शेख (वय २३ रा.उमर मशिद जवळ मास्टर कॉलनी, जळगाव), नोझेल मशिनद्वारे डिझेल भरणारा शोएब खान मंजुर खान (वय ३३ रा. गणेशपुरी साहिल किराणा समोर, मास्टर कॉलनी, जळगाव), ट्रक चालक अली दय्यान अली अब्बास (वय ४३ रा.विलाल चौक, तांबापुरा) असे सांगितले. त्याचे ताब्यातून ६८हजार ८०० रु. कि.चे बायोडिझेल व १४ लाख ५० हजार रु. कि. चे दोन वाहने ताब्यात घेण्यात आले असून त्याबाबत डि.बी. जाधव, पुरवठा तपासणी अधिकारी यांचे फिर्यादी वरून एमआयडीसी पो.स्टे. ला गुन्हा दाखल करण्यात आला आहे.
